Ба мавқеи фаъоли Тоҷикистон оид ба масъалаи баробарии гендерӣ баҳои баланд дода шуд

ДУШАНБЕ, 10.05.2019 /АМИТ «Ховар»/. Масъалаи баробарии гендерӣ ва ҳуқуқу имкониятҳои занон зимни мулоқоти муовини раиси  Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон Ҷамшед Маҳмадзода бо ҳайати сохтори Созмони Милали Муттаҳид оид ба масъалаҳои баробарии гендерӣ, густариши ҳуқуқҳо ва имкониятҳои занон баррасӣ гардид.

Тавре аз маркази матбуоти Кумитаи мазкур ба мухбири АМИТ «Ховар» иттилоъ доданд, зимни мулоқот нақши занон дар рушди Кумитаи ҳолатҳои фавқулода, густариши ҳуқуқҳо ва имкониятҳои онҳо мавриди муҳокима қарор гирифт.

Ҷамшед Маҳмадзода дар бораи талошҳои Ҷумҳурии Тоҷикистон оид ба таъмини баробарии гендерӣ сухан карда, гуфт: «Яке аз ҳадафҳои аввлиндараҷаи Ҳукумати Ҷумҳурии Тоҷикистон бо шуғл таъмин намудани занон мебошад, ки он ҳамчун шарти аслии беҳбуди шароити иқтисодӣ ва мухторияти онҳост».

Ҳайати намояндагони СММ ба талошҳои Ҳукумати Ҷумҳурии Тоҷикистон дар мавриди баробариҳои гендерӣ ва мавқеи фаъолонаи мамлакат дар ин созмони ҷаҳонӣ оид ба ин масъала баҳои баланд доданд.