Дар Норак доир ба пешгирии ифротгароӣ ҳамоиши васеъ баргузор гардид

НОРАК, 10.05.2019. /АМИТ «Ховар»/. Бо мақсади  иҷрои Фармони  Президенти  Ҷумҳурии  Тоҷикистон «Дар бораи Стратегияи  миллии Ҷумҳурии Тоҷикистон оид ба  муқовимат  ба  экстремизм  ва  терроризм  барои  солҳои  2016-2020»,  пешгирии шомил  гардидани  муҳоҷирони меҳнатӣ ба ҳизбу  ҳаракатҳои  бегона,  таъмини  нақшаи  сафарбар  намудани ҷавонон ба сафи Қувваҳои Мусаллаҳи Ҷумҳурии Тоҷикистон дар толори  мақомоти иҷроияи ҳокимияти шаҳри Норак  бо иштироки намояндагони ҳифзи ҳуқуқи шаҳр, фаъолон ва роҳбарони корхонаҳою муассисаҳои таълимиву фарҳангии шаҳр ҳамоиши васеъ баргузор гардид.

Дар ҷамъомад раиси шаҳри Норак Фатҳулло Ҳурматзода, комиссари ҳарбии шаҳр Сироҷиддин Абдуллоев ва сардори шуъбаи Кумитаи давлатии амнияти миллӣ сухан гуфта, оид ба сабабу шароити шомилшавии шаҳрвандон ба ҳизбу ҳаракатҳои бегона, хатари терроризм ва экстремизм ба амнияти Тоҷикистон ва ҷаҳон, таҳти назорат қарор додани рафтуомади муҳоҷирони меҳнатии мавсимӣ, ҳамзамон дар рӯҳияи ифтихори миллию ватанпарастӣ тарбия намудани насли наврас, таҳкими ваҳдату ягонагӣ, тинҷиву оромӣ дар мамлакат  ибрози назар карданд.

Дар фарҷоми ҳамоиш раиси шаҳр аз фаъолон хоҳиш намуд, ки баҳри пешгирии ҳама гуна амалҳои номатлуб дар ҷомеа бо мақомоти ҳифзи ҳуқуқ  робитаро пурзӯр намуда,  вазифаи хизматиро дар назди ҷомеа софдилона иҷро намоянд.