Таксиҳои Душанбе то 15 июни соли равон бояд ба намои зоҳирии ягонаи қабулгардида мутобиқ карда шаванд

ДУШАНБЕ, 28.05.2019. /АМИТ «Ховар»/. Мақомоти иҷроияи ҳокимияти давлатии шаҳри Душанбе ба таваҷҷуҳи ронандагон ва соҳибкороне, ки дар пойтахти мамлакат  ба фаъолияти мусофиркашонӣ машғуланд, мерасонад, ки то 15 июни соли равон воситаҳои нақлиёти сабукрави таксиро бо намои зоҳирии ягонаи қабулгардида мутобиқ гардонанд.

Тавре аз Раёсати иттилоот ва робитаҳои хориҷии дастгоҳи Раиси шаҳри Душанбе ба АМИТ «Ховар»  хабар  доданд, ин иқдом  бо мақсади иҷрои қарорҳои дахлдори Раиси шаҳри Душанбе Рустами Эмомалӣ доир   ба низом даровардани раванди фаъолияти воситаҳои нақлиёти автомобилии сабукрави таксӣ, роҳандозӣ намудани онҳо бо намои зоҳирии якранга дар ҳудуди шаҳри Душанбе, ҳифз ва ҳимояи ҳуқуқи истифодабарандагони хизматрасонии нақлиётӣ  роҳандозӣ мегардад.

Ёдовар мешавем, ки Мақомоти иҷроияи ҳокимияти давлатии шаҳри Душанбе аз 10 ноябри соли 2018 то 10 декабри соли 2018  байни шахсони воқеӣ  ва  ҳуқуқии  ватанию  хориҷӣ  оид  ба  таҳияи лоиҳаи намои зоҳирии  воситаҳои  нақлиёти автомобилии сабукрави таксӣ озмуни кушод  эълон намуда буд.

Мақомоти  мазкур  4 январи соли равон бо нашри як хабар  ғолиби озмуни лоиҳаи намои зоҳирии воситаҳои нақлиёти автомобилии сабукрави таксии пойтахтро эълон намуда буд.

Тибқи иттилои манбаъ, озмун 28 декабри соли 2018 бо Қарори Раиси шаҳр Рустами Эмомалӣ ҷамъбаст гардида, лоиҳаи пешниҳоднамудаи муаллими калони кафедраи нақшакашии муҳандисии Донишгоҳи техникии Тоҷикистон ба номи академик Муҳаммад Осимӣ Бадриддин Қурбонов қабул ва номбурда ғолиб эълон карда шуд.

«Ба Бадриддин Қурбонов, ки миёни шахсони воқеиву ҳуқуқӣ дар озмун ғолиб омад, ба маблағи 5 ҳазор сомонӣ мукофотпулӣ дода шуд», — илова намуд манбаъ.

Аз рӯйи расми ангоравии лоиҳаи қабулгардида, қисми болоии мошин зард аст, ду паҳлӯяш нуктаҳои сиёҳ ва навиштаҷоти Душанбе дошта, дар он ҷойи навиштани рақами тамоси хадамоти таксии ин ё он ширкат ва реклама мавҷуд аст. Ин нишонаҳо дар бештари мамлакатҳои мутараққӣ ҳамчун намои ягона қабул гардидаанд.