Дар Душанбе аввалин Мусобиқаи ҷумҳуриявӣ оид ба шоҳмот барои дарёфти Ҷоми Президенти Ҷумҳурии Тоҷикистон расман оғоз гардид

Июнь 10, 2019 08:41

ДУШАНБЕ, 10.06.2019. /АМИТ«Ховар»/. Нимаи дуюми рӯзи 8 июн дар «Боғи Ирам»-и шаҳри Душанбе бо баргузории Фестивали шоҳмот аввалин Мусобиқаи ҷумҳуриявӣ оид ба шоҳмот барои дарёфти Ҷоми Президенти Ҷумҳурии Тоҷикистон  расман оғоз гардид.

Дар Фестивал  раиси Кумитаи кор бо ҷавонон ва варзиш, ноиби Президенти Кумитаи миллии олимпии Тоҷикистон Аҳтам Абдуллозода, намояндаи Дастгоҳи иҷроияи Президенти Ҷумҳурии Тоҷикистон Адҳам Маъмурзода ва дигар масъулин иштирок доштанд.

Дар ин бора ба хабарнигори АМИТ «Ховар» Меҳрони  Қурбон муовини аввали Раиси  Кумитаи кор бо ҷавонон ва варзиши назди Ҳукумати Ҷумҳурии Тоҷикистон Ризо Назарзода  хабар дод.

Дар оғози Фестивал Аҳтам Абдуллозода  зикр кард, ки дар доираи супориши Асосгузори сулҳу ваҳдати миллӣ – Пешвои миллат, Президенти мамлакат, Президенти Кумитаи миллии олимпии Тоҷикистон муҳтарам Эмомалӣ Раҳмон дар ҷумҳурӣ бори аввал Ҷоми Пешвои миллат оид ба шоҳмот дар чор марҳила миёни наврасон, ҷавонон ва калонсолон баргузор мешавад. Фонди ҷоизавии мусобиқа 100 ҳазор  сомониро ташкил медиҳад, ки аллакай аз ҷониби Президенти ҷумҳурӣ муҳтарам Эмомалӣ Раҳмон ҷудо гардидааст.

«Мояи ифтихор аст, ки имрӯз наврасони тоҷик дар ин намуди варзиш дар арсаи байналмилалӣ шарафи варзишии  мамлакатро ҳифз карда, ба дастовардҳои беназир  ноил мегарданд. Чанд рӯз қабл варзишгари навраси ҷумҳурӣ  Сабрина Абророва дар як мусобиқаи бонуфуз дар шаҳри Ханти Мансийскийи Федератсияи Россия  миёни 60 давлати ҷаҳон ғолиб шуд. Барои ин комёбӣ  ба Сабрина ва падару модар, инчунин мураббии ӯ изҳори миннатдорӣ  мекунам», — афзуд А.Абдуллозода.

Зикр шуд, ки хароҷоти сафари Сабрина Абророва ҷиҳати иштирок дар мусобиқаҳои ояндаи байналмилалӣ аз ҷониби Пешвои миллат маблағгузорӣ мешавад.

Адҳам Маъмурзода  иброз дошт,  ки шоҳмот намуди варзише мебошад, ки барои ташаккули шахсияти инсон мусоидат мекунад.  Номбурда афзуд, ки дар ин робита бо супориши Президенти ҷумҳурӣ 3 сол мешавад, ки дар муассисаҳои таҳсилоти умумии мамлакат  барномаи таълимии шоҳмот ва маҳфилҳову дастурамалҳо ба роҳ монда шудааст, ки заминаи мусоид барои рушди ин намуди  варзиш  дар ҷумҳурӣ  мегардад.

Сипас бо пеш кардани муҳраҳои шоҳмот аз ҷониби ноиби Президенти Кумитаи миллии олимпии Тоҷикистон Аҳтам Абдуллозода ва ғолиби Бозиҳои ҷаҳонии наврасон Сабрина Абророва Ҷоми Пешвои миллат оид ба шоҳмот оғоз гардид.

Ёдовар мешавем, ки даври аввали мусобиқаи ҷумҳуриявӣ оид ба шоҳмот барои дарёфти Ҷоми Президенти ҷумҳурӣ   аз 10 июн то 8 июл дар сатҳи маҳал, деҳа, шаҳрак, вазорату идораҳо, ташкилоту муассисаҳо, муассисаҳои таълимии олию миёна, даври дуюм аз 8 июл то 25 август дар сатҳи шаҳру ноҳияҳо бо иштироки ғолибони даври якум, даври сеюм аз 5 то 25 сентябр дар сатҳи вилоятҳо ва шаҳри Душанбе бо иштироки ғолибони даври дуюм  баргузор  мешавад.

Даври ниҳоии мусобиқа  аз 1 то 5 октябри соли равон  ба ифтихори Рӯзи забони давлатӣ дар сатҳи ҷумҳурӣ бо баргузории фестивали оммавӣ баргузор мешавад.

Бояд илова кард, ки барои ҷои якуми даставӣ 30 ҳазор  сомонӣ, барои ҷои дуюми даставӣ 25 ҳазор  сомонӣ, барои ҷои сеюми даставӣ 20 ҳазор  сомонӣ ва барои ғолибони мусобиқоти инфиродӣ дар се синну сол 25 ҳазор  сомонӣ пешбинӣ шудааст.

Июнь 10, 2019 08:41

Хабарҳои дигари ин бахш

Соли 2025 варзишгарони Тоҷикистон дар мусобиқаҳои байналмилалӣ 238 медал ба даст оварданд
НИШАСТИ МАТБУОТӢ. Донишҷӯёни Донишкадаи тарбияи ҷисмонӣ дар мусобиқаҳои байналмилалӣ соҳиби 26 медал шуданд
Таеквондочиёни тоҷик дар Чемпионати Осиё дар Малайзия ду медали биринҷӣ ба даст оварданд
Паҳлавонони тоҷик «Ulaanbaatar Grand Slam-2025»-ро бо як медали нуқра ҷамбаст намуданд
Марҳилаи якуми даврҳои омӯзишӣ оид ба барномаи литсензияи «B» идома дорад
Имрӯз мусобиқаи байналмилалии «Ulaanbaatar Grand Slam-2025» оид ба гӯштини ҷудо оғоз меёбад
Дар Чемпионати ҷаҳон оид ба варзиши намудҳои обӣ 2 варзишгари Тоҷикистон иштирок менамоянд
Бозии интихобии Ҷоми Осиё-2027 байни Тоҷикистон ва Малдив дар Хуҷанд баргузор мешавад
Тоҷикистон бозиҳои марҳилаи интихобии Ҷоми Осиё-2026 байни духтарони то 17-соларо мизбонӣ менамояд
Пагоҳ дар Душанбе маросими қуръакашии Ҷоми Тоҷикистон-2025 баргузор мегардад
Намояндаи Конфедератсияи футболи Осиё варзишгоҳи Турсунзодаро тафтиш намуд
Дар шаҳри Душанбе мусобиқаи «Шоми бокс» баргузор мешавад