Кумитаи ҳолатҳои фавқулодда ва мудофиаи гражданӣ огоҳ менамояд: дар рӯзҳои боронӣ бештар эҳтиёткор бошед!

Июнь 6, 2019 11:13

ДУШАНБЕ, 06.06.2019 /АМИТ «Ховар»/. Тавре қаблан хабар додем,  тибқи иттилои  Агентии обуҳавошиносии Тоҷикистон  то 7 июн дар мамлакат ҳавои ноустувор боқӣ мемонад. Дар натиҷаи боришоти шадид дар ҷумҳурӣ эҳтимоли рух додани офатҳои табиӣ, аз ҷумла омадани сел, фаромадани тармаву  ярч ва резиши  сангпораҳо вуҷуд дорад.

Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон ба сокинону меҳмонони ҷумҳурӣ муроҷиат намуда, хоҳиш  кардааст, ки  дар ин рӯзҳои боронӣ  бештар эҳтиёткор бошанд ва чораҳои амниятиро риоя намоянд. Аз сафар ба кӯҳҳо, ҷамъоварии ҳезум  ва дигар амалҳое, ки дар маҳалҳои кӯҳӣ мегузаранд, худдорӣ намоянд.

Тавре аз Кумитаи ҳолатҳои фавқулодда ва мудофиаи гражданӣ  ба АМИТ «Ховар»  иттилоъ доданд, боду ҳавои номусоид ва боришоти зиёди рӯзҳои охир дар ҳудуди як қатор шаҳру ноҳияҳои мамлакат боиси омадани сел гардид.

Аз  ҷумла,  4 июни соли  равон  дар  ҳудуди  деҳаи Рӯзи Обноки ҷамоати деҳоти Ёрии шаҳри Панҷакент сел омада, 1 манзили истиқоматии сокини ин деҳаро пурра вайрон кардааст. Муттаасифона, дар натиҷаи ин ҳодиса  ду нафар бародарон, ки аз шаҳри Душанбе ба деҳаи мазкур барои аёдат рафта буданд, ба ҳалокат расиданд. Алҳол ҷасади яке ёфт шуда,  дигарӣ дар кофтуков қарор дорад.

Тибқи иттилои манбаъ, барои бартараф намудани ҳолати рухдода комиссияи ҳолатҳои фавқулоддаи шаҳри Панҷакент ва  дастаи зудамали наҷотдиҳии Кумитаи ҳолатҳои фавқулодда ва мудофиаи гражданӣ дар водии Зарафшон  фаъолият  доранд.

Ҳамчунин 5 июни соли равон  дар деҳаи Оби Шифои ҷамоати деҳоти Чоргултеппаи ноҳияи Рӯдакӣ сел омада, ба 80 қитъаи заминҳои наздиҳавлигӣ ва таҳхонаҳои хонаи истиқоматӣ зарар расонид. Аҳолии деҳаи мазкур ҷиҳати пешгирии ҳодисаҳои  нохуш ба ҷойҳои бехавф кӯчонида шуданд. Дар ин ҳодисаи табиӣ  ҳисороти ҷонӣ ба қайд гирифта нашудааст.

«Барои ташкили кор дар бартарафсозии офати табиӣ гурӯҳи корӣ таҳти роҳбарии муовини якуми раиси Кумитаи ҳолатҳои фавқулодда ва мудофиаи гражданӣ Рустам Шоҳиён ба ҷойи ҳодиса сафарбар шуд. Барои анҷом додани корҳои бартарафсозӣ дар деҳаҳои зарардида, аз ҳисоби наҷотдиҳандагон, сарбозон ва афсарони қисмҳои ҳарбии Кумита гурӯҳ таъсис дода, бо истифода аз теникаҳои махсус корҳо идома доранд».

Ёдовар мешавем, ки шаҳрвандон метавонанд дар ҳолати сар задани ин ё он ҳолати фавқулодда ба телефонҳои навбатдори Кумитаи ҳолатҳои фавқулодда ва мудофиаи гражданӣ: 93 880 28 19, 221-91-19, 223-13-11 дар тамос шаванд.

Июнь 6, 2019 11:13

Хабарҳои дигари ин бахш

«МАКТАБИ СИЁСИИ ПЕШВОИ МИЛЛАТ». Таҳти ин унвон дар шаҳри Бохтар конференсияи байналмилалии илмӣ-амалӣ доир мегардад
ХУРОФОТ ҶАҲОЛАТ АСТ. Дар ҷамоатҳои шаҳри Исфара бо сокинон оид ба хатари таассуб мулоқот доир шуд
Охири моҳи апрел ва аввали май Тоҷикистонро ҳавои номусоид интизор аст. Таъсири он ба соҳаи кишоварзӣ чӣ гуна аст?
Дар якчанд минтақаҳои Тоҷикистон корҳои безараргардонии жола анҷом ёфтанд
«ДӮСТ ОЯД ГАРМ ДАР ОҒӮШ ГИР!». Дар Тоҷикистон аввалин меҳмонии ҷавонони ҷумҳурӣ дар минтақаҳо оғоз шуд
Дар Конибодом доир ба оқибатҳои ногувори таассубу хурофотпарастӣ ва омилҳои пешгирии он мулоқот доир шуд
Дар Душанбе масоили ҳуқуқ, таҳсил ва бокортаъминкунии маъюбон таҳлилу баррасӣ гардид
Дар Тоҷикистон мавсими эҳтимолии сел, обхезӣ ва сангрезӣ аст. Чиро бояд дар хотир дошт?
Дар Восеъ довталабони хизмати аскарӣ соҳиби шаҳодатномаи ронандагӣ шуданд
Ба беморхонаи ноҳияи Шуғнон нақлиёти «Ёрии таъҷилии тиббӣ» тақдим гардид
Маликшо Неъматзода ва Осама Маккави барои амалӣ намудани барномаҳои ҳамкорӣ изҳори омодагӣ намуданд
Дар Душанбе Конвенсия оид ба ҳуқуқҳои маъюбон мавриди баррасӣ қарор гирифт