ФУТБОЛ: дастаи мунтахаби ҷавонони Тоҷикистон бо дастаи мунтахаби Арабистони Саудӣ ду бозии рафиқона анҷом медиҳад

ДУШАНБЕ, 05.07.2019. /АМИТ «Ховар»/. Федератсияҳои футболи Тоҷикистону Арабистони Саудӣ ҷиҳати доир кардани ду бозии рафиқона миёни дастаҳои мунтахаби ҷавонон ба тавофуқ расиданд.

Тавре аз Федератсияи футболи Тоҷикистон ба мухбири АМИТ «Ховар» Меҳрони ҚУРБОН хабар доданд, бозиҳои рафиқона миёни дастаҳои мунтахаби  ҷавонони то 18-солаи Арабистони Саудӣ ва Тоҷикистон 26 ва 29 июл дар шаҳри Таиф баргузор мешаванд. Ҳайати асосии дастаи мунтахаби Тоҷикистонро бозингароне ташкил медиҳанд, ки тирамоҳи имсол дар Чемпионати ҷаҳон дар Бразилия иштирок мекунанд.

Ҳамчунин ин бозиҳо барои дастаи мунтахаби ҷавонони Тоҷикистон  як марҳилаи омодагӣ ба мусобиқоти интихобии Чемпионати Осиё-2020 маҳсуб меёбанд. Дастаи мунтахаби ҷавонони Тоҷикистон дар гурӯҳи «С» бозӣ мекунад, ки ҳарифонаш дастаҳои  мунтахаби ҷавонони Сурия, Лубнон ва Малдив ҳастанд.

Ёдовар мешавем, ки бозиҳои ин гурӯҳ 2-6 октябр дар шаҳри Душанбе доир мегарданд. Ғолибони 11 гурӯҳ ва 4 дастаи беҳтарини ҷои дуюми гурӯҳҳо ба марҳилаи финалии Чемпионати Осиё-2020 миёни ҷавонон роҳхат мегиранд.