Роҳбарони хадамоти консулии Вазорати корҳои хориҷии кишварҳои узви ИДМ имрӯз дар Душанбе ҷамъ меоянд

ДУШАНБЕ, 19.07.2019. /АМИТ «Ховар»/. Ҷаласаи XXVI Шӯрои машваратии роҳбарони хадамоти консулии вазоратҳои корҳои хориҷии кишварҳои узви Иттиҳоди Давлатҳои Мустақил 19 июл дар шаҳри Душанбе (Тоҷикистон) баргузор мегардад. Дар ин бора хабарнигори АМИТ «Ховар» хабар медиҳад.

Аъзои Шӯро масъалаҳои татбиқи муқаррароти Конвенсияи Вена оид ба муносибатҳои консулӣ аз 24 апрели соли 1963 ва конвенсияҳои дуҷонибаи консулиро муҳокима мекунанд. Илова бар ин, ҷанбаҳои гуногуни ҳамкории тарафҳо дар доираи конвенсияҳо оид ба кумаки ҳуқуқӣ ва муносибатҳои ҳуқуқӣ дар масъалаҳои шаҳрвандӣ, оилавӣ ва ҷиноӣ аз 22 январи соли 1993 ва 7 октябри соли 2002 баррасӣ карда мешаванд.

***

Дар баробари ин, тавре ба АМИТ «Ховар» аз Кумитаи иҷроияи ИДМ хабар доданд:

19-20 июл дар Ашқобод ҷаласаи Шӯро оид ба ҳамкорӣ дар соҳаи тандурустии ИДМ доир мегардад.

Иштирокдорони ҷаласа самтҳои афзалиятноки рушди ҳамкорӣ дар соҳаи тандурустӣ дар доираи Иттиҳод, татбиқи қарорҳои мақомоти баландпояи Иттиҳоди Давлатҳои Мустақилро дар соҳаи тандурустӣ (махсусан, марбут ба ҳамкорӣ дар пешгирӣ ва табобати диабети қанд, огоҳсозии паҳншавии бемории сил, татбиқи Стратегияи «Аҳолии солими давлатҳои иштирокдори Иттиҳоди Давлатҳои Мустақил», фаъолияти ташкилотҳои асосӣ дар соҳаи психиатрия ва наркология), инчунин қарорҳои Шӯро оид ба ҳамкорӣ дар соҳаи тандурустии ИДМ баррасӣ хоҳанд кард.

24 июл дар шаҳри Москва ҷаласаи Комиссия оид ба масъалаҳои иқтисодӣ дар назди Шӯрои иқтисодии ИДМ баргузор мегардад.

26 июл дар Минск ҷаласаи Шӯрои намояндагони доимии ваколатдори кишварҳои узви Иттиҳоди Давлатҳои Мустақил ва дигар мақомоти Иттиҳод доир мешавад.

1-2 август дар шаҳри Минск ҷаласаи гурӯҳи коршиносон оид ба ҳамоҳангсозии лоиҳаи Низомномаи портали гуманитарии байнидавлатии «Ҳамоҳангӣ: адабиёт ва публисистикаи кишварҳои Иттиҳод» ва Қарори Шӯрои вазирони корҳои хориҷии ИДМ доир ба ин масъала баргузор мегардад.

23 август дар шаҳри Душанбе ҷаласаи Шӯрои ҳамоҳангсозии роҳбарони мақомоти тафтишоти андозбандӣ (молиявӣ) баргузор мегардад.