Сарвазири Ҷумҳурии Қазоқистон Аскар Мамин бо сафари расмӣ ба Ҷумҳурии Тоҷикистон ташриф овард

ДУШАНБЕ, 11.07.2019 /АМИТ «Ховар»/. Нимаи дуюми имрӯз  Сарвазири Ҷумҳурии Қазоқистон Аскар Мамин бо сафари расмӣ ба Ҷумҳурии Тоҷикистон ташриф овард, хабар медиҳад мухбири АМИТ «Ховар».

Меҳмони олиқадрро дар Фурудгоҳи байналмилалии Душанбе Сарвазири Ҷумҳурии Тоҷикистон Қоҳир Расулзода ва дигар шахсони расмӣ пешвоз гирифтанд.

Ба ифтихори истиқболи расмии меҳмони олиқадр дар фурудгоҳ парчамҳои Тоҷикистон ва Қазоқистон барафрохта шуда, инчунин қаровули фахрӣ ва оркестри асбобҳои нафасӣ  саф ороста буданд.

Ёдовар мешавем, ки имрӯз дар назар аст дар ҷараёни сафари расмӣ Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам  Эмомалӣ Раҳмон Сарвазири Ҷумҳурии Қазоқистон Аскар Маминро ба ҳузур пазиранд.

Инчунин музокироти ҳайатҳои ҳукуматӣ бо роҳбарии Сарвазири Ҷумҳурии Тоҷикистон Қоҳир Расулзода ва Сарвазири Ҷумҳурии Қазоқистон Аскар Мамин баргузор мегарданд.

Аз рӯи натиҷаҳои сафар чанд созишнома ба имзо хоҳад расид.

Дар доираи сафари расмӣ Сарвазири Ҷумҳурии Қазоқистон Аскар Мамин аз майдони «Дӯстӣ» — и шаҳри Душанбе дидан карда, бо арзи эҳтиром ба пояи муҷассамаи Исмоили Сомонӣ, Маҷмааи меъмории «Ваҳдати миллӣ ва эҳёи Тоҷикистон» гулчанбар мегузорад.