Дар Москва ҷаласаи Шӯрои коршиносони мақомоти гумруки кишварҳои ИДМ баргузор гардид

ДУШАНБЕ, 29.08.2019/АМИТ «Ховар»/. Дар ҷаласаи гурӯҳи кории коршиносони  Шӯрои роҳбарони мақомоти гумруки кишварҳои аъзои Иттиҳоди Давлатҳои Мустақил /ИДМ/, ки зарфи ду рӯз- 28-29 август дар пойтахти Россия- шаҳри Москва доир гардид, масъалаҳои    тақвияти ҳамкории хадамоти гумруки  кишварҳои ИДМ матраҳ гардид. Дар ин хусус ба АМИТ «Ховар» аз Хадамоти гумруки назди Ҳукумати Ҷумҳурии Тоҷикистон иттилоъ доданд.

Коршиносони Шӯрои  роҳбарони мақомоти гумруки давлатҳои ИДМ- Тоҷикистон, Ӯзбекистон, Қазоқистон, Қирғизистон, Россия, Арманистон ва Озарбойҷон ширкат варзида, дар радифи як зумра масъалаҳои ташкилӣ лоиҳаҳои талаботи стандартҳои амнияти иттилоотии системаҳои иттилоотӣ ва захираҳои мақомоти гумрук, технологияи муосири ҳамкорӣ миёни мақомоти гумрук ва интиқоли роҳи оҳани кишварҳои узви ИДМ, ки барои осон кардани содагардонии расмиёти ҳамкорӣ миёни мақомоти гумрук ва мақомоти роҳи оҳан дар ҳудуди ИДМ нигаронида шудааст ва дигар масъалаҳои вобаста ба самти фаъолияти гумрукиро матраҳ намуданд.

Бояд зикр кард, ки бо дарназардошти моҳияти равандҳои ҳамгироӣ дар доираи Иттиҳод, фаъолияти асосии Шӯро ба тахассус ва мутобиқати қонунгузории гумрук, ташаккули механизмҳои самарабахши тарифӣ ва танзими ғайритарифӣ, таҳияи тавсияҳо оид ба муттаҳидсозии қоидаҳо ва тартиботи гумрукӣ, шаклҳои ҳуҷҷатгузорӣ барои таъмини назорати гумрукӣ, ташкили табодули омори гумрукии савдои хориҷӣ, таҳияи барномаҳои стратегӣ барои таъмини мақомоти гумруки ИДМ бо воситаҳои техникӣ нигаронида шудааст.

Дар ҷаласа сана ва макони баргузории ҷаласаи 71-уми Шӯрои роҳбарони мақомоти гумруки ИДМ  баррасӣ гардид, иттилоъ медиҳад сарчашма.