Истиқбол аз ҷашни Истиқлолияти давлатӣ дар Бонки миллии Тоҷикистон

Сентябрь 6, 2019 16:00

ДУШАНБЕ, 06.09.2019/АМИТ «Ховар»/. Ба ифтихори 28-умин солгарди ҷашни Истиқлолияти давлатии Ҷумҳурии Тоҷикистон, ки 9 сентябр таҷлил мегардад,  дар Бонки миллии Тоҷикистон бо иштироки роҳбарият ва кормандони он маҷлиси тантанавӣ доир   гардид.  Раиси Бонки миллии Тоҷикистон Ҷамшед Нурмаҳмадзода ҳайати кормандонро бо ин санаи фархунда ва таърихӣ табрик намуда, ба онҳо барои саҳм гузоштан дар рушди низоми бонкӣ комёбиҳо орзу намуд. Мавсуф зикр кард, ки бо соҳибистиқлол гардидани  Тоҷикистон дар китоби таърихи миллат саҳифаи нав бо номи даврони Истиқлолият оғоз гардид.

Раиси БМТ бо ёдоварӣ аз солҳои аввали Истиқлолият таъкид намуд, ки бунёди давлати миллӣ марҳилаи бисёр душвор ва ҳассос буд. Аз нахустин рӯзҳои эълони Истиқлолият мушкилоти сиёсию иқтисодӣ ва иҷтимоию фарҳангӣ, ки хоси ҳамин марҳила аст, дар мамлакат пеш омада, мамлакат ба гирдоби буҳрони сиёсию иқтисодӣ ва иҷтимоию маънавӣ мувоҷеҳ  гардид.

-Ба бахти миллати тоҷик ва бо амри тақдир дар он айёми сарнавиштсоз масъулияти роҳбарии Тоҷикистон ба дӯши фарзанди  ватанпарасти миллат, сиёсатмадори барҷаста Эмомалӣ Раҳмон вогузор гардид. Пешвои миллати мо бо такя ба имону виҷдон ва донишу хиради мардуми шарифамон тавонистанд ба Тоҷикистон сулҳ оваранд ва зиндагии орому осударо дар мамлакат таъмин намоянд,-иброз дошт Ҷамшед Нурмаҳмадзода.

Зикр гардид, ки бо шарофати Истиқлолият ва раҳбариву раҳнамоии Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон имрӯз чор ҳадафи стратегии мамлакат – раҳоӣ аз бунбасти коммуникатсионӣ, таъмини амнияти озуқаворӣ, таъмини истиқлолияти энергетикӣ ва саноатикунонии босуръати ҷумҳурӣ зина ба зина амалӣ шуда истодаанд. Ин имкон медиҳад, ки Тоҷикистон дар ояндаи наздик ба давлати содиркунандаи неруи барқи арзону аз лиҳози экологӣ тоза ва қаламрави транзитӣ табдил ёфта, тадриҷан дар сохтори муносибатҳои иқтисоди ҷаҳонӣ мавқеи шоиста пайдо намояд.

Гуфта шуд, ки яке аз рӯйдодҳои  фараҳбахши даврони Истиқлолияти давлатӣ- ин ба истифода додани чархаи аввали Неругоҳи барқи обии “Роғун” аст. Дар ин маврид Ҷамшед Нурмаҳмадзода ташаббус ва заҳматҳои шабонарӯзии Пешвои муаззами миллатро махсус зикр карда, гуфт, ки имсол дар  рӯзи таҷлили ҷашни фархундаи Истиқлолият чархаи дуюми ин иншооти бузурги аср ба истифода дода мешавад. Ин саҳифаи заррин дар китоби таърихи давлатдории нави мо буда, барои пешрафти  мамлакат ва таъмини истиқлолияти энергетикиямон заминаи мусоид мегузорад.

-Саҳми барҷастаи Асосгузори сулҳу ваҳдати миллӣ – Пешвои миллат, Президенти мо муҳтарам Эмомалӣ Раҳмон на танҳо дар бунёди давлати миллӣ, балки дар таҳкими пояҳои ҷомеаи имрӯз, аз ҷумла ташкил ва рушди низоми бонкии мамлакат арзанда мебошад. Имрӯз низоми бонкии мамлакат ҳамқадами Истиқлолият пеш меравад ва ба дастовардҳои назаррас ноил мегардад. Вазифаи ҷонии ҳар кадоми мо гузоштани саҳми назаррас дар пешрафти низоми бонкии мамлакат ба ҳисоб меравад, -таъкид намуд Раиси Бонки миллии Тоҷикистон.

Дар маҷлиси тантанавӣ кормандони фаъоли Бонки миллии Тоҷикистон бо нишони сарисинагии «Аълочии Бонки миллии Тоҷикистон»  ва Ифтихорномаи Бонки миллии Тоҷикистон сарфароз гардонида шуданд.

 

Сентябрь 6, 2019 16:00

Хабарҳои дигари ин бахш

ҚУРБИ АСЪОР: дар Тоҷикистон 1 доллари ИМА аз 10.9546 то 10.9800 сомонӣ муқаррар шудааст
Президенти Тоҷикистон: «Ҷашни Наврӯз ва истиқлолу озодӣ – ин ду мафҳуми барои ҳар яки мо азизу муқаддас аст»
«КАЪБА ЧӢ МЕРАВӢ, ДИЛЕРО ДАРЁБ…». Андешаҳо дар ҳошияи мулоқоти Президенти Тоҷикистон бо фаъолону намояндагони ҷомеа ва ходимони дин
Пешвои миллат: «Боиси ифтихор аст, ки Наврӯз – калимаи асили тоҷикӣ, яъне «рӯзи нав» ҳоло барои миллионҳо аҳолии сайёра ҳамчун рӯзи ҷашни фархунда вирди забон аст»
Эмомалӣ Раҳмон: «Наврӯз аз ҷумлаи бузургтарин ва маҳбубтарин ҷашнҳои тоҷикон мебошад»
СИЁСИШАВИИ ДИН — ХАТАР БА ФАРҲАНГИ МИЛЛӢ ВА СУБОТИ ҶОМЕА. Андешаҳои профессор Нозим Маҳмадизода дар ин мавзуъ
Президенти Тоҷикистон: «Бо назардошти шароити замона анъанаи неки гузаштагон – сарфаю сариштакориро бояд риоя намоем»
Сулаймон Талбакзода: «Дарси хештаншиносӣ ва хизмат ба халқу Ватанро аз Пешвои миллат бояд омӯзем»
Президенти Тоҷикистон: «Мушкилоти таъмини аҳолии сайёра бо озуқаворӣ моро водор менамояд, ки ҳар қитъа заминро оқилонаву самаранок истифода барем»
Пешвои миллат Эмомалӣ Раҳмон: «Ойинҳои наврӯзӣ аҳли башарро ба таҳаммулгароӣ, бунёдкориву созандагӣ ҳидоят менамоянд»
Пешвои миллат: «Дар шароити кунунӣ зарур аст, ки ба кишти такрорӣ, гирифтани се – чор ҳосил аз заминҳои обӣ эътибори аввалиндараҷа дода шавад»
НАВРӮЗ-РАМЗИ ХУДШИНОСИВУ ИФТИХОРИ МИЛЛӢ. Дар Бонки миллии Тоҷикистон Наврӯзи ҷаҳонӣ таҷлил шуд