Дар Душанбе Мусобиқаи ҷумҳуриявӣ оид ба гимнастикаи бадеӣ байни наврасон баргузор мегардад

ДУШАНБЕ, 25.10.2019. /АМИТ «Ховар»/. Пагоҳ, 26 октябр дар шаҳри Душанбе Мусобиқаи ҷумҳуриявӣ оид ба гимнастикаи бадеӣ  байни наврасони солҳои таваллудашон ‎2004 -2005, 2006 – 2007 оғоз мегардад. Дар ин  бора  котиби матбуоти  Кумитаи кор бо ҷавонон ва варзиши назди Ҳукумати Ҷумҳурии Тоҷикистон Каримҷон Салимзода ба шореҳи варзиши АМИТ «Ховар» Меҳрони Қурбон хабар дод.

Тибқи иттилои манбаъ, чемпионати мазкур муддати ду рӯз-26-27 октябр  идома ёфта, беҳтарин чеҳраҳои варзишии мамлакатро  муайян менамояд. Чемпионати мазкурро Шин Виолетта  сардоварӣ менамояд.

Ёдовар мешавем, ки марҳилаи аввали чемпионат дар мамлакат 22 сентябр  доир гардид. Дар даври дуюми он 13 октябр   беҳтаринҳо дар сатҳи минтақа ва вилоят барои роҳхат ба даври ниҳоии чемпионат қуваозмоӣ намуданд.

Дар даври ниҳоӣ варзишгарон аз дастаҳои Хатлон 1, Хатлон 2, Суғд, шаҳру ноҳияҳои тобеи ҷумҳурӣ ва шаҳри Душанбе барои мақомҳои ифтихорӣ миёни ҳам рақобат менамоянд.