Директори АМИТ «Ховар» бо Сафири Фавқулода ва Мухтори Арабистони Саудӣ дар Тоҷикистон мулоқот намуд

ДУШАНБЕ, 10.10.2019. /АМИТ «Ховар»/. Масъалаҳои тақвияти ҳамкорӣ дар самти табодули иттилоот, инъикоси рӯйдодҳои муҳим ва дастовардҳои назаррас дар расонаҳои давлатии Ҷумҳурии Тоҷикистон ва Шоҳигарии Арабистони Саудӣ имрӯз зимни мулоқоти Директори Агентии миллии иттилоотии Тоҷикистон «Ховар» Саидалӣ Сиддиқ бо Сафири Фавқулода ва Мухтори Шоҳигарии Арабистони Саудӣ дар Ҷумҳурии Тоҷикистон Абдулазиз ибни Муҳаммад Ал-Бодӣ баррасӣ гардиданд.

Ҷонибҳо рушди муносиботи ду давлатро дар соҳаҳои иқтисодию фарҳангӣ ва сайёҳӣ муҳим арзёбӣ намуда, тарғибу ташвиқи маконҳои сайёҳӣ, обҳои мусаффо ва шифобахш, табиати хушманзару маконҳои таърихии Тоҷикистонро дар расонаҳои саудӣ муфид зикр намуданд.

С. Сиддиқ ба роҳ мондани ҳамкорӣ миёни АМИТ «Ховар» ва Агентии иттилоотии давлатии Арабистони Саудиро ба манфиати  ҳарду давлат арзёбӣ намуда, иброз дошт, ки ҷониби Тоҷикистон лоиҳаи созишномаи ҳамкориро дар ин робита таҳия  ва ба ҷониби Арабистони Саудӣ пешниҳод намудааст.   Мавриди амал қарор гирифтани созишномаи мазкур дар инъикоси рӯйдодҳои муҳими ҳарду давлат ва тарғибу ташвиқи дастовардҳо заминаи амиқ хоҳад гузошт.

Сафири Арабистони Саудӣ иброз дошт, ки баҳри роҳандозии робитаҳои иттилоотӣ ва ҳамкории расонаӣ мусоидат хоҳад кард. Ӯ зикр намуд, ки иқтидорҳои истифоданашуда дар ҳамаи соҳаҳо зиёданд ва баҳри татбиқи онҳо бояд пайваста талош намуд.

Тарафҳо робитаҳои дӯстонаи сарони давлатҳоро дар рушди муносиботи дуҷониба муҳим арзёбӣ намуданд.