Пагоҳ дар Душанбе Форуми ҷумҳуриявии занон доир мегардад

ДУШАНБЕ, 08.10.2019 /АМИТ «Ховар»/. 9 октябр  дар Китобхонаи миллии Тоҷикистон дар мавзӯи «Баланд бардоштани маърифати сиёсиву ҳуқуқии занону ҷавондухтарон – омили рушди суботи ҷомеа» Форуми ҷумҳуриявии занон баргузор мегардад.

Тавре аз Кумитаи кор бо ҷавонон ва варзиши назди Ҳукумати Ҷумҳурии Тоҷикистон ба АМИТ «Ховар» хабар доданд,  форуми мазкур таҳти сарпарастии Сафири Созмони байналмилалии «Занони сиёсатмадори Роҳбар»- Роҳбари Дастгоҳи иҷроияи Президенти Ҷумҳурии Тоҷикистон  Озода Раҳмон  баргузор шуда, дар он иштироки олимону муҳаққиқони ҷавон, занони барӯманди ҷумҳурӣ, намояндагони ҷавони вазорату идораҳо  ва ташкилоту муассисаҳо, муовинони  соҳавии мақомоти иҷроияи ҳокимияти давлатии шаҳру ноҳияҳои ҷумҳурӣ аз ҳисоби занон, донишҷӯдухтарон ва гирандагони стипендияҳои Президентӣ  дар назар аст.

Форуми  мазкур  фарогири масоили мубрами  ҷомеа буда, он  якчанд бахшҳоро дар бар мегирад.

Мавриди зикр аст, ки  мавқеи занону ҷавондухтарон дар зинаи идоракунии давлатӣ, сабабҳо ва роҳу усулҳои пешгирии шомилшавии занону ҷавондухтарон ба гурӯҳҳои террористиву экстремистӣ, нақши занони соҳибкор дар рушди иқтисодиёти мамлакат, пешгирии хушунат ва зӯроварӣ дар оила ва нақши бонувон дар рушди илм ва инноватсия аз бахшҳои муҳими форум маҳсуб меёбанд.