Милитсияи Душанбе 3 нафар қиморбозро дастгир намуд

ДУШАНБЕ, 09.12.2019 /АМИТ «Ховар»/. Кормандони Раёсати Вазорати корҳои дохилӣ   дар шаҳри Душанбе 3 нафар қиморбозро дастгир намуданд, ки дар бозору маконҳои серодамаи пойтахт ба қартабозӣ бо пул машғул шуда, бо роҳи фиребу макр маблағҳои шаҳрвандонро аз они худ мекардаанд. Бо дарназардоти ҳолатҳои мазкур нисбат ба  номбурдагон санадҳои  ҳуқуқвайронкунии маъмурӣ тартиб дода шуданд. Бо  ҳукми Суд нисбат ба  ҳар кадоме ҷазо дар намуди ҳабси маъмурӣ ба муҳлати 7-шабонарӯзӣ татбиқ карда шудааст.

Тавре аз маркази матбуоти Раёсати мазкур ба АМИТ «Ховар» хабар доданд, дастгиршудагон сокини 35-солаи ноҳияи Восеъ Баротов Муродалӣ Тошмадович, зодаи  дигари ҳамин ноҳия  Олимов Зафар Файзовичи 43-сола ва истиқоматкунандаи  шаҳри Кӯлоб  Шоқулов Шаҳзод Мустафоевичи 35-сола мебошанд, ки қаблан низ чандин маротиба барои машғул шудан ба қиморбозӣ боздошт ва нисбат ба онҳо  тадбирҳои  қонунӣ андешида шуда буд.

Аммо ин нафарон ба ҷойи ба хулосаи зарурӣ омадан ва даст кашидан аз  мардумфиребӣ боз  ба чунин  кирдори ношоиста даст заданд, ки  барои ин  амалашон дар назди қонун ҷавоб мегӯянд.