Таъмири мошини «Ёрии таъҷилӣ» аз ҷониби гунаҳгори садамаи нақлиётӣ ба роҳ монда мешавад

Декабрь 10, 2019 12:31

 ДУШАНБЕ, 10.12.2019 /АМИТ «Ховар»/. Ҳодисаи 1 декабри соли равон дар чорроҳаи кӯчаи М.Турсунзода —  Беҳзоди пойтахт  ба садама дучор гардидани  мошини  “Ёрии таъҷилӣ”  зери таҳқиқи  кормандони  Раёсати  Вазорати корҳои дохилӣ  дар   шаҳри Душанбе қарор дошт. Дар натиҷаи  таҳқиқот маълум гардид, ки ҳодисаи мазкур бо айби ронандаи  мошини тамғаи «Тайота-Кемрӣ»  (рақами қайди давлатиаш 1011 ВВ 01)  таҳти идораи  истиқоматкунандаи шаҳри Душанбе, кӯчаи Фирдавсӣ,  донишҷӯи Донишгоҳи Миллии Тоҷикистон Шаҳриёр Рустамови 19-сола  ба вуқӯъ пайвастааст. Нисбат ба  ронандаи  мошини тамғаи «Тайота-Кемрӣ»  шаҳрванд Шаҳриёр Рустамов барои вайрон кардани талаботи банди 130 ва 61, қисми 5 –и «Қоидаҳои ҳаракат дар роҳ»  бо моддаи 333-и Кодекси ҳуқуқвайронкунии маъмурии Ҷумҳурии Тоҷикистон  санади  ҳуқуқвайронкунии маъмурӣ тартиб дода шуд. Тибқи муқаррароти қонунгузории Ҷумҳурии Тоҷикистон таъмири  мошини “Ёрии таъҷилӣ” аз ҷониби гумонбари асосии ҳодиса шаҳрванд Рустамов Шаҳриёр ба роҳ монда шуда, таҳқиқ дар ин самт идома дорад.

Тавре аз  маркази матбуоти Раёсати мазкур ба АМИТ «Ховар» хабар доданд,  зимни омӯзиш ва гузаронидани корҳои таҳқиқотӣ муайян гардид, ки  Шаҳриёр Рустамов ба талаботи чароғаки раҳнамо итоат накарда, бо суръати баланд дар ранги сурх роҳро убур кардааст.

Дар ҳамин  асно ба мошини  “Ёрии таъҷилӣ”, ки таҳти идораи ронанда  Миралӣ Лоиқов  қарор дошта,   дар дохили он  3 нафар духтур бо хабари оҷилӣ, дар ҳолати фаъол будани воситаҳои махсус (мигалка) ҳаракат дошт, бархӯрда,  ӯро чаппа  кардааст. Хушбахтона, дар натиҷаи ин  садамаи нақлиётӣ  талафоти ҷонӣ ба қайд гирифта нашудааст, вале ҳарду мошин  зарари техникӣ дидаанд.

Мавриди зикр аст, ки мувофиқи қонунгузорӣ ба воситаҳои нақлиёти “Ёрии таъҷилӣ”, сухторхомӯшкунӣ ва якчанд воситаҳои нақлиёти дигар ҳангоми ҳаракат дар роҳ бартарӣ дода шуда, дигар ронандагон уҳдадор мебошанд, ки ба онҳо роҳ кушода, монеи ҳаракати чунин воситаҳои нақлиёт нагарданд.

Мутаассифона, дар ҷомеа баъзан ронандагоне ҳастанд, ки талаботи «Қоидаҳои ҳаракати роҳ»-ро риоя накарда, баръакс, ба таври дағалона онро вайрон мекунанд. Ин амал дар аксар маврид бо чунин  ҳодисаҳои нохуш меанҷомад.

Декабрь 10, 2019 12:31

Хабарҳои дигари ин бахш

Дар доираи «Барномаи омодасозии мутахассисон аз ҳисоби ҷавонон барои соҳаҳои иқтисодиёт» беш аз 41 ҳазор нафар бо ҷойи кор таъмин гардид
Дар Вазорати адлияи Тоҷикистон бахшида ба Рӯзи Парчами давлатӣ ҳамоиши илмӣ доир шуд
Дар шаш муассисаи тиббии шаҳри Душанбе барномаи рақамии «eTib» фаъол гардид
Вазири меҳнат, муҳоҷират ва шуғли аҳолии Тоҷикистон дар Конфронси Вена оид ба муҳоҷират иштирок намуд
Дар Душанбе бахшида ба татбиқи Ёддошти тафоҳум дар соҳаи тандурустӣ байни Тоҷикистон ва Амрико чорабинӣ баргузор шуд
Барномаи ҳамкорӣ байни Хадамоти иҷрои Тоҷикистон ва Бюрои иҷрои маҷбурии Узбекистон ба имзо расид
Конгресси байналмилалии «Инсон ва дору» баргузор гардид
Пешгирии бемориҳои сироятӣ масъулияти ҳар шаҳрванд аст
Дар Пекин масъалаҳои рушди қонунгузорӣ ва таҷрибаи муосири давлатдорӣ баррасӣ гардиданд
Дар Москва ҷаласаи 11-уми Алянси Авруосиёии омбудсменҳо баргузор гардид
Бахшида ба Рӯзи Президент дар вилояти Суғд роҳпаймоии идона баргузор шуд
Ҳамкории ҳуқуқии Тоҷикистону Чин дар Пекин баррасӣ гардид