Дабири кулли СММ: шиддати геополитикӣ дар асри кунунӣ ба сатҳи баландтарин расид

ДУШАНБЕ, 07.01.2020 /АМИТ «Ховар»/. Дабири  кулли Созмони Милали Муттаҳид Антонио Гутерриш изҳор дошт, ки шиддати геополитикӣ дар олам ба сатҳи баландтарини худ расидааст, хабар медиҳад АМИТ «Ховар» бо истинод ба ТАСС.

«Соли нав бо ташвишу изтироб оғоз мегардад, баён дошт ӯ рӯзи душанбе дар изҳороташ ба рӯзноманигорон баъд аз кушта шудани генерал Қосим Сулаймонӣ ва аз ҷониби Эрон қатъ гардидани уҳдадориҳои созишномаи ҳастаӣ. Ташаннуҷи геополитикӣ  дар асри мо ба авҷи аъло расидааст».

Дар изҳороти худ  Дабири кулл на Эрон ва на Амрикоро бевосита номбар накард. Ҳамзамон Гутерриш зикр намуд, ки «носуботии ҷаҳонӣ меафзояд ва ҳатто халъи силоҳи ядроӣ ҳамчун як чизи муқаррарӣ маънидод мегардад».

Дабири кулл гуфт, ки ӯ «марҳилаи кунунии доман паҳн кардани шиддат»-ро назорат мекунад ва ҳамеша дар робитаи қавӣ бо роҳбарони ҷаҳонӣ қарор дорад. Вале, бо вуҷуди ин, ӯ ба саволҳои иловагии  ВАО ҷавоб надод.

Гутерриш рӯзи душанбе  аз роҳбарони ҷаҳон даъват ба амал овард, ки гуфтушунидро дубора барқарор созанд  ва ба оғоз гаштани ҷанг роҳ надиҳанд. «Ман бо ҳиси нигаронӣ авҷгирии шиддатнокиро мушоҳида мекунам», — гуфт ӯ.

«Ман бо роҳбарони ҷаҳонӣ дар  робитаи доимӣ ҳастам, — хабар дод Гутерриш. Паёми ман одӣ ва возеҳ аст: шиддатнокиро бояд боздошт. То ҳадди имкон бояд худдорӣ намуд. Гуфтушунидро идома диҳед. Ҳамкории байналмилалиро барқарор намоед. «Биёед  фаромӯш насозем, ки ҷанг ба одамон чӣ гуна паёмадҳои даҳшатнок  меорад, — гуфт ӯ.  Пешгирии он вазифаи  ҳамаи мост».