Дар Туркия шумораи қурбониёни заминларза ба 19 нафар ва осебдидагон ба беш аз 770 кас расид

ДУШАНБЕ, 25.01.2020 /АМИТ «Ховар»/. Дар музофотҳои Малатия ва Элазиги Туркия бар асари заминларза на кам аз 19 нафар ба ҳалокат расида, 772 кас маҷрӯҳ гардиданд. Тавре АМИТ «Ховар» хабар медиҳад, дар ин бора агентии «Анадолу»-и Туркия бо истинод ба вазири тандурустии ин кишвар иттилоъ додааст.

Чанде пеш дар бораи 18 қурбонӣ ва 553 нафар осебдида иттилоъ расида буд.

Рӯзи ҷумъа, соати 02.55 ба вақти Душанбе дар маркази шаҳри Сивриҷи музофоти Элазиг заминларзаи шиддатнокиаш 6,8 рух дод.

Президенти Туркия Раҷаб Тайип Эрдуғон эълом дошт, ки вазъро пайгирӣ дорад. Ӯ итминон дод, ки муассисаҳо барои рафъи оқибатҳои заминларза тамоми тадбирҳои заруриро меандешанд.

Дар маҳалли офати табиӣ 493 гурӯҳи наҷотдиҳандагон аз 28 музофот фаъолият доранд. 1,689 хайма, 1,656 кат ва 9,200 кӯрпа ба минтақаи зилзила интиқол дода шуданд. Ширкатҳои мобилӣ дар Элазиг ва Малатия хидматрасонии ройгон эълон карданд.