Музаффар Ҳусейнзода дар Рим як зумра мулоқоти судманд анҷом дод

ДУШАНБЕ, 30.01.2020 /АМИТ «Ховар»/. Муовини Вазири корҳои хориҷии Ҷумҳурии Тоҷикистон Музаффар Ҳусейнзода 29 январ дар Рим як зумра  мулоқоти судманд анҷом дод, хабар медҳад АМИТ «Ховар» бо истинод ба Вазорати корҳои хориҷии Ҷумҳурии Тоҷикистон.

29 январ мулоқоти Музаффар Ҳусейнзода бо муовини мудири иҷроияи Барномаи озуқавории ҷаҳонӣ Амир Абдуллоҳ баргузор гардид.

Ҷонибҳо дар бораи тақвияти ҳамкорӣ дар самти таҳкими иқтидори муассисаҳои соҳавӣ, истифодаи таҷрибаи пешқадам дар соҳаи кишоварзӣ ва мудирияти об, истифодаи неруи хуршедӣ дар соҳаи кишоварзӣ, коҳиши пайомадҳои тағйирёбии иқлим ва дигар масъалаҳои мавриди эҳтимоми тарафайн мубодилаи афкор намуданд.

Инчунин 29 январ дар Рим вохӯрии муовини Вазири корҳои хориҷии Ҷумҳурии Тоҷикистон Музаффар Ҳусейнзода бо Ноиби ректор оид ба масъалаҳои байналмилалии Донишгоҳи Сапиенза Бруно Ботта баргузор гардид.

Дар вохӯрӣ ҷонибҳо масъалаҳои марбут ба рушди муносибатҳои илмиву гуманитарӣ миёни донишгоҳҳои Ҷумҳурии Тоҷикистон ва донишгоҳи мазкур, аз ҷумла ҷудо намудани бурсияҳо барои донишҷӯён аз Тоҷикистон дар чаҳорчӯби барномаҳои кишварӣ ва Иттиҳоди Аврупо, мубодилаи академикӣ ҷиҳати омода намудани мутахассисон дар соҳаҳои мухталифро мавриди баррасӣ қарор доданд.

Аксҳо аз ВКХ ҶТ