Руҳонӣ гунаҳгорони ҳодисаи «Boeing»-и украиниро ба ҷавобгарӣ мекашад

ДУШАНБЕ, 11.01.2020 /АМИТ «Ховар»/.  Эрон аз иштибоҳе, ки нисбат ба ҳавопаймои «Ширкати ҳавопаймоии байналмилалии Украина» дар наздикии Теҳрон роҳ дода шуд, сахт андӯҳгин аст. Тавре АМИТ «Ховар» бо истинод ба ТАСС хабар медиҳад, дар ин бора рӯзи шанбе президенти Эрон Ҳасани Рӯҳонӣ эълом дошт.

«Ҷумҳурии Исломии Эрон аз ин иштибоҳи фоҷиабор сахт андӯҳгин аст», — навиштааст ӯ дар саҳифаи «Твиттер»-аш. Рӯҳонӣ ҳамчунин ба қурбониёни фоҷиа изҳори тасаллият кард.

Ӯ тазаккур дод, ки таҳқиқи ин ҳодиса то муайян шудани ҳолатҳои «фоҷиаи бузург» ва «иштибоҳи нобахшиданӣ» идома хоҳад ёфт.

Рӯҳонӣ ваъда дод, ки гунаҳгорони нобудсозии ҳавопаймои украиниро ба ҷавобгарӣ мекашад.

Субҳи рӯзи шанбе хабаргузории «ISNA» изҳороти ситоди генералии қувваҳои мусаллаҳи Эронро паҳн кард. Дар он гуфта мешавад, ки ҳавопаймои «Ширкати ҳавопаймоии байналмилалии Украина» дар наздикии Теҳрон «дар натиҷаи иштибоҳи тасодуфии инсонӣ» зада шуд.

Тибқи изҳорот, ин ҳавопаймо дар наздикии яке аз иншооти муҳими низомии Сипоҳи посдорони инқилоби исломӣ (воҳидҳои баргузидаи қувваҳои мусаллаҳи Эрон) буда, аз рӯи шакл ва баландии парвоз он бо «объекти душман» шабоҳат доштааст.

ДАР АКС: Президенти Эрон Ҳасани Рӯҳонӣ. © Майкл Метсел / ТАСС