Антониу Гутерриш Сезин Синаноғлуро Ҳамоҳангсози доимии СММ дар Тоҷикистон таъйин кард

ДУШАНБЕ, 26.02.2020 /АМИТ «Ховар»/. Дабири кулли СММ Антониу Гутерриш Сезин Синаноғлуро ба ҳайси Ҳамоҳангсози доимии СММ дар Тоҷикистон бо розигии ҳукумати давлати мизбон таъйин кард. Дар ин бора АМИТ «Ховар» бо истинод ба иттилоияи хадамоти матбуоти СММ, ки 20 феврал интишор гардид, хабар медиҳад.

Дар иттилоия гуфта мешавад, ки хонум Синаноғлу таҷрибаи 25-сола дар соҳаи рушд дошта, аз ҷумла 22 сол дар Барномаи Рушди СММ (БРСММ) кор кардааст. Аз моҳи июли соли 2015 ӯ ҳамчун Ҳамоҳангсози доимии СММ ва ҳамзамон то охири соли 2018 ба ҳайси Намояндаи доимии БРСММ дар Босния ва Ҳерсеговина фаъолият намудааст.

То ин дам ӯ Ҳамоҳангсози доимии СММ ва Намояндаи доимии БРСММ дар Муғулистон буд. Ӯ ҳамчунин дар БРСММ дар Ироқ, Туркманистон ва Қирғизистон, инчунин дар Барномаи ихтиёриёни СММ дар Бонни Германия вазифаҳои баландро ишғол кардааст.

Ӯ инчунин ба ҳайси шаҳрсоз дар ҳукумати Туркия ва дар бахши хусусӣ дар ИМА то соли 1995- замони ба Идораи БРСММ дар Туркия ба сифати корманди барномавӣ ҳамроҳ шудан фаъолият намудааст.

Хонум Синаноғлу дорои дараҷаи бакалавр аз рӯи ихтисоси банақшагирии шаҳрӣ ва минтақавӣ ва дараҷаи магистр аз рӯи ихтисоси банақшагирии шаҳрии Донишгоҳи Техникии Шарқи Наздик дар Анқара мебошад.