Берун аз ҳудуди Чин нахустин фавт аз бемории коронавирус ба қайд гирифта шуд
![](https://khovar.tj/wp-content/uploads/2020/02/koronovirus-1.jpg)
ДУШАНБЕ, 03.02.2020 /АМИТ «Ховар»/. Марги нахустин бар асари коронавируси 2019-nCoV берун аз Чин дар Филиппин ба қайд гирифта шудааст. Тавре АМИТ «Ховар» хабар медиҳад, дар ин бора рӯзи якшанбе дар Twitter шуъбаи филиппинии Ташкилоти Умумиҷаҳонии Тандурустӣ ( ТУТ) иттилоъ додааст.
«Марди 44-сола, ки қаблан шахси дуюми гирифтори ин беморӣ дар Филиппин буд, 1 феврали соли 2020 вафот кард»,- гуфта мешавад дар изҳороти ТУТ. «Ин ҳолати аввалини ба қайд гирифта шудани фавт берун аз Чин аст. Аммо, набояд фаромӯш кард, ки ӯ аз Ухани Чин омадааст»,- изҳор намуд Рабӣ Абейсингх, намояндаи ин ташкилот дар Филиппин зимни нишасти матбуотӣ, ки тавассути Facebook-и Вазорати тандурустии ҷумҳурӣ пахш мешуд.
«Дар Филиппин ду ҳолати гирифторӣ ба ин беморӣ тасдиқ гардида буд. Ҳарду нафар қаробати наздик дошта, сокинони Ухани Чин буданд». Ҳамзамон ТУТ зикр намуд, ки маъмурияти беморхонаи Сан-Лазаро, ки он ҷо шахсони сироятёфта ҷойгиранд, барои пешгирӣ ва мубориза бо ин навъи бемориҳо тадбирҳои эҳтиётӣ андешид.
Акс : © EPA-EFE/STRINGER