«ИНТИХОБОТ ВА ЗАНОН». Дар ҳавзаҳои интихоботии шаҳри Душанбе номзадии 75 зан ба қайд гирифта шуд

ДУШАНБЕ, 21.02.2020. /АМИТ «Ховар»/. Аз 229 номзад ба вакилии Маҷлисҳои маҳаллии вакилони халқи шаҳри Душанбе, ки дар ҳавзаҳои интихоботии шаҳри Душанбе ба қайд гирифта шудаанд, 75 нафарашро (33%) занон ташкил медиҳанд. Дар ин бора сардори Раёсати кор бо занон ва оилаи Мақомоти иҷроияи ҳокимияти давлатии шаҳри Душанбе Наргис Шарифзода ба хабарнигори АМИТ «Ховар» иброз намуд.

Бино ба маълумоти номбурда, шумораи номзадҳо ба вакилӣ дар ҳавзаҳои ноҳиявии шаҳри Душанбе, аз ҷумла дар ноҳияи Сомонӣ 87 нафар (39 зан),  Сино 118 нафар (45 зан), Шоҳмансур 108 (30 зан), Фирдавсӣ 111 (25 зан), дар маҷмӯъ 424 нафар  (139 зан) ба қайд гирифта шудаанд.

«Дар солҳои Истиқлолияти давлатии Ҷумҳурии Тоҷикистон таваҷҷуҳ, дастгирӣ ва ғамхориҳои пайвастаи Пешвои миллат муҳтарам Эмомалӣ Раҳмон нисбат ба бонувон хеле зиёд гардида, мақоми зан баланд бардошта шуд.  Бо дарки ин нукта бонувон ҳамеша дар татбиқи дастуру супоришҳои Сарвари давлат ва амалӣ намудани қонунҳои амалкунандаи мамлакат бо масъулияти баланд саҳми намоён  мегузоранд», — гуфт Наргис Шарифзода.

Зикр гардид, ки хушбахтона, дар маъракаҳои сиёсии солҳои қаблӣ занону бонувон бо истифода аз ҳуқуқҳои конститутсиониашон фаъолона иштирок намуда, ба ҳизбҳои сиёсӣ ва номзадҳои арзанда овоз медоданд.

Дар Паёми навбатии Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бори дигар таъкид шуд, ки дар ҳамаи самтҳо, аз ҷумла дар интихоботи вакилони Маҷлиси намояндагони Маҷлиси Олии мамлакат иштироки фаъолонаи занон таъмин карда шавад.

Ба андешаи ҳамсуҳбат, бо мақсади таъмини иштироки фаъолонаи занон дар ҳаёти ҷамъиятӣ ва идораи давлат, баланд бардоштани мақоми иҷтимоии зан ва солим гардонидани генофонди миллӣ, болоравии нақши зан дар таҳкими пояҳои ахлоқию маънавӣ ва сулҳу суббот Фармони  Президенти Ҷумҳурии Тоҷикистон муҳтарам Эмомалӣ Раҳмон «Дар  бораи тадбирҳои баланд бардоштани мақоми зан дар ҷомеа аз 3 декабри соли 1999 ба тасвиб расид. Дар  банди 2-и фармони мазкур зикр гардидааст, ки  Ҳукумати Ҷумҳурии Тоҷикистон, мақомоти ҳокимият ва идораи давлатӣ занонро бо дар назардошти салоҳиятнокӣ ва сифатҳои касбию кордониашон ба ҳайати роҳбарикунандаи вазоратҳо, кумитаҳои давлатӣ, идораҳо, корхонаҳо, ташкилоту муассисаҳои давлатӣ, мақомоти ҳокимияти иҷроияи маҳаллӣ, ҷамоатҳо, мақомоти прокуратура ва суд, таълимгоҳҳои олӣ ва дигар муассисаҳои маориф таъйин намоянд.

Номбурда аз шароити муҳайёгаштаи Ҳукумати мамлакат барои занон дар замони соҳибистиқлолии мамлакат ёдовар шуда, изҳор намуд, ки дар ин давра як зумра санадҳои меъёриву ҳуқуқӣ, аз ҷумла қонунҳои Ҷумҳурии Тоҷикистон, “Дар бораи кафолатҳои баробарҳуқуқии мардону занон ва имкониятҳои баробарии амалигардонии онҳо”, “Дар бораи тадбирҳои баланд бардоштани мақоми зан дар ҷомеа”,  Барномаи давлатии тарбия, интихоб ва ҷобаҷогузории кадрҳои роҳбарикунандаи Ҷумҳурии Тоҷикистон аз ҳисоби занону духтарони лаёқатманд барои солҳои 2007-2016, Барномаи давлатӣ оид ба пешгирии зӯроварӣ дар оила дар Ҷумҳурии Тоҷикистон барои солҳои 2014-2023 ба тасвиб расида, квотаи президентӣ барои духтарони ноҳияҳои дурдаст таъсис дода шуд.

«Ин ғамхориҳои Пешвои миллат муҳтарам Эмомалӣ Раҳмон мо-занонро водор менамоянд, ки чун ҳамеша атрофи ин сиёсат муттаҳид гашта, вазифаҳои бар зиммамон гузоштаро сарбаландона иҷро намоем ва дар маъракаи муҳими сиёсӣ-интихобот фаъолона ширкат  варзем», — иброз намуд сардори Раёсати кор бо занон ва оилаи Мақомоти иҷроияи ҳокимияти давлатии шаҳри Душанбе Наргис Шарифзода.