Китобхона ба назди хонанда омад. Дар кӯчаҳои шаҳри Хоруғ ҷевонҳои шишагини пур аз китоб гузошта шуданд

Февраль 14, 2020 16:23

ХОРУҒ, 14.02.2020 /АМИТ «Ховар»/. Дар хиёбони марказӣ ва ҳар кӯчаи маҳаллаҳои шаҳри Хоруғи Вилояти Мухтори Кӯҳистони Бадахшон «китобхонаҳо»-и сайёри ғайриодӣ гузошта шуданд, ки таваҷҷуҳи ҳар роҳгузарро ба худ ҷалб менамоянд. Ин ҷевонҳои шишагини ғайриодиро аъзои Ташкилоти ҷамъиятии «Умедвор» дар ҳамкорӣ бо ширкати «Помирэнерҷӣ» дар кӯчаҳои шаҳр гузоштанд.

Ба гуфтаи роҳбари ТҶ «Умедвор» Маҳмуд Раҳимбеков, “чанд соли охир дар мамлакат барои ҷалби таваҷҷуҳи насли наврас ва ҳам ҷавонону калонсолон ба мутолиаи китоб аҳамияти хосса зоҳир мешавад. Амрҳои Президенти Ҷумҳурии Тоҷикистон дар бораи нашри китоби «Тоҷикон»-и Бобоҷон Ғафуров ва идомаи озмунҳои «Фурӯғи субҳи доноӣ китоб аст» ва «Тоҷикистон- ватани азизи ман» моро водор намуданд, ки  дар амалӣ намудани ин иқдомҳои наҷиби Сарвари давлат  нақши худро гузорем”.

Ҳамсуҳбати мо мегӯяд, ки аксарияти китобхонаҳои вилоятиву шаҳрӣ дар маркази шаҳр ҷойгиранд, кӯдакону наврасон ва ҷавононе, ки дар маҳаллаҳои дур аз марказ иқомат доранд, дар лаҳзаҳои зарурӣ наметавонанд аз хизматрасонии онҳо истифода баранд. Барои аз байн бурдани ин мушкилот онҳо қарор доданд, ки дар маҳали зисташон китобхонаҳои хурди сайёр дар шакли ҷевонҳои шишагин ташкил намоянд.

“Барои татбиқи ин лоиҳа ба ширкати «Помирэнерҷӣ» муроҷиат кардем ва бо кумаки ин ширкат ҷевонҳои шишагинро бо китобҳои дарсиву бадеӣ, илмиву фарҳангӣ пур намудем. Ҳоло теъдоди ин китобҳо то ба 1500 нусха расидааст»,-иброз намуд Маҳмуд Раҳимбеков.

Як тан узви ин китобхонаи сайёр Абдураҳим Абдураҳимов, ки 5 километр дуртар аз маркази шаҳр сукунат дорад, ин иқдоми ҷавононро лоиқи таҳсин шумурда, гуфт, ки чанд бор бе ягон душворӣ ва сабти ном аз ин ҷевон китоби писандидаашро гирифта, баъди мутолиа боз онро ба ҷояш гузоштааст.

Ягона хоҳиши аъзои Ташкилоти ҷамъиятии «Умедвор» аз хонандагон ин аст, ки китобҳоро поку тамиз нигоҳ дошта, сари вақт бозпас гардонанд.

Февраль 14, 2020 16:23

Хабарҳои дигари ин бахш

Дар Душанбе оид ба нақши осори Ҷалолуддини Балхӣ дар ҳамгироии фарҳангии давлатҳо дар шароити ҷаҳонишавӣ конференсияи байналмилалӣ доир шуд
Дар Душанбе Фестивали байналмилалии театрҳои лӯхтак баргузор мегардад
22 СЕНТЯБР-РӮЗИ РӮДАКӢ. Маликушшуаро бо осори гаронбаҳо, сухани равону шево ва дурдонаҳои нодири ашъораш ба адабиёти тоҷик асос гузошт
Дар Консерваторияи миллии Тоҷикистон ҷиҳати таҳқиқ ва тармими созҳои миллии мусиқӣ озмоишгоҳи омӯзишӣ таъсис дода шуд
Камол Насрулло: «Одамушшуаро Абуабдулло Рӯдакӣ мазҳари ифтихор, худшиносӣ ва сарбаландии ҳар фарди бедордили тоҷик мебошад»
Озмуни ҷумҳуриявии «Библиомарафон» ва маҳфили шеъру суруди «Рӯдакихонӣ» ҷамъбаст гардид
БАХШИДА БА РӮЗИ РӮДАКӢ. Устод Рӯдакӣ падидаи нодири забонӣ ва адабии рӯзгори Сомониён мебошад
БАХШИДА БА РӮЗИ РӮДАКӢ. Бозтоби масъалаҳои рӯдакишиносӣ дар номаҳои устод Садриддин Айнӣ
ПЕШВОИ МИЛЛАТ ВА РУШДИ ВОСИТАҲОИ АХБОРИ ОММА ДАР ЗАМОНИ ИСТИҚЛОЛИ ДАВЛАТӢ. Инкишофи он ба ҳайси ниҳоди иҷтимоӣ барои ҳар давлати ҷаҳони муосир хеле муҳим аст
БАХШИДА БА РӮЗИ РӮДАКӢ. Чанд сухан атрофи ишқи Ватан дар осори Одамушшуаро ва маҷрои бардавоми «Ҷӯи мӯлиён»
Дар Душанбе ҷаласаи гурӯҳи корӣ оид ба таъминоти меъёрию техникии лоиҳаҳои дар соҳаи фаъолияти кайҳонӣ амалишаванда баргузор шуд
«РӮДАКӢ, ЗАБОН ВА ФАРҲАНГИ МИЛЛӢ». Таҳти ин унвон дар Душанбе бахшида ба Рӯзи Рӯдакӣ конференсияи илмӣ баргузор мешавад