Мақомоти Чин дар бораи қаллобоне, ки мехостанд аз ҳисоби коронавирус маблағ ба даст оранд, хабар дод

ДУШАНБЕ, 07.02.2020 /АМИТ «Ховар»/. Мақомоти ҳифзи ҳуқуқи Чин беш аз ҳазор парвандаи қаллобиро дар робита ба паҳншавии коронавирус боз карда, 294 нафарро аллакай дастгир  намудаанд. Дар ин бора АМИТ «Ховар» бо истинод ба изҳороти Вазорати амнияти ҷамъиятии Чин иттилоъ медиҳад.

«Айни замон, аз ҷониби мақомоти амнияти ҷамъиятӣ 1116 парвандаи қаллобӣ муайян ва боз гардида, 294 нафар дастгир  ва беш аз 6,6 миллион юан (беш аз 9,1 миллион сомонӣ, — шарҳи АМИТ «Ховар») маблағҳои ғоратшуда мусодира гардидаанд», — омадааст дар изҳороти Вазорати амнияти ҷамъиятии Чин.

Ба иттилои вазорат, мақомоти ҳифзи ҳуқуқ тавонистаанд се тарҳи асосии қаллобиро муайян кунанд. Беш аз ҳама ҷинояткорон аз ҳисоби камёфт будани ниқобҳои муҳофизатӣ пул кор кардаанд. Қаллобон дар бораи харидории ниқобҳо ё доштани молҳои зарурӣ дар анбор эълон дода, пас аз гирифтани маблағ рақамҳои телефони харидорон ё шабакаҳои иҷтимоии онҳоро масдуд мекарданд ё сабабҳои гуногуни нафиристодани молро пеш меоварданд.

Тибқи тарҳи дигар, қаллобон худро ҳамчун ташкилоти хайриявӣ вонамуд карда, бо баҳонаи ҷамъоварии маблағ барои мубориза бо паҳншавии ин беморӣ сомонаҳо ва саҳифаҳои шабакаҳои иҷтимоии қалбакӣ таъсис медодаанд ва пас аз гирифтани хайрия ғайб мезадаанд.

Инчунин қаллобон бо роҳи фиреб тавассути гурӯҳҳои мухталифи паёмрасонҳо (мессенҷерҳо) гӯё барои кумак ҷиҳати мубориза бо коронавирус  маблағ ба даст меовардаанд.