Си Ҷинпин изҳор дошт, ки вазъият дар Чин мураккаб боқӣ мемонад

ДУШАНБЕ, 24.02.2020 /АМИТ «Ховар»/. Вазъият дар Чин дар заминаи паҳн гаштани коронавируси нав ҳанӯз ҳам мушкил боқӣ монда, мубориза бо ин беморӣ ба марҳилаи буҳронӣ расидааст. Тавре АМИТ «Ховар» бо истинод ба ТАСС  хабар медиҳад, изҳороти мазкурро рӯзи якшанбе Раиси Ҷумҳурии Мардумии Чин  Си  Ҷинпин  дар ҷаласаи Кумитаи  ҳамоҳангсозии рушди иҷтимоию  иқтисодӣ  ва муқовимат бар зидди беморие, ки  тавассути коронавируси нав пайдо шудааст, эълон намуд.

«Вазъияти баамаломадаи сироятӣ ҳамоно мураккаб ва ҷиддӣ  боқӣ мемонад»,-иқтибос меорад суханони Си Ҷинпинро телевизиони марказии Чин. «Пешгирӣ ва  назорати беморӣ дар марҳилаи буҳронӣ  қарор дорад»,- гуфт ӯ.

Раиси ҶМЧ даъват ба амал овард, ки «кумитаҳои ҳизбӣ ва ҳукумат дар тамоми сатҳҳо эътимод ба пирӯзиро ҳифз намоянд, дандон ба дандон  ниҳанд,  аммо  ба фориғболӣ  роҳ надиҳанд ва ҳамоно барои пешгирӣ ва  назорати беморӣ мубориза  баранд».

«Зарур аст, ки тазъиқро ( ба кишвар)  ба неруи мутаҳаррики пешбаранда табдил диҳем, сиёсати аксуламалро комил намоем, неруи бузурги кишварамонро пурра ошкор созем ва барои ноил шудан ба нишондиҳандаҳои рушди иқтисодӣ ва иҷтимоии (Чин)  соли равон тамоми кӯшишҳоямонро ба харҷ диҳем»,- гуфт Си Ҷинпин.

«Дар роҳи таърихии миллати Чин мушкилиҳои зиёде ҷой доштанд, вале бо вуҷуди ин  чизе онро маҳв карда натавонист, бараъкс, боз  ҳам қавитару  устувортар гашт, дар айёми пуразият ӯ боз ҳам қомат боло намуда, ба мубориза бармехост»,- дар хулоса таъкид намуд раиси  ҶМЧ .