Ҷумҳурии Тоҷикистон бо Бонки Аврупоии Таҷдид ва Рушд созишномаҳои грантӣ ба имзо расонид

ДУШАНБЕ, 11.02.2020 /АМИТ «Ховар»/. Байни Ҷумҳурии Тоҷикистон, Муассисаи давлатии «Хоҷагии манзилию коммуналӣ» – и назди Мақомоти иҷроияи ҳокимияти давлатии шаҳри Кӯлоб ва Бонки Аврупоии Таҷдид ва Рушд оид ба Лоиҳаи «Идоракунии партовҳои сахти маишии шаҳри Кӯлоб», инчунин байни Ҷумҳурии Тоҷикистон, Корхонаи давлатии коммуналии «Нақлиёти мусофирбари  шаҳри Хуҷанд» ва Бонки Аврупоии Таҷдид ва Рушд оид ба Лоиҳаи «Рушди нақлиёти ҷамъиятӣ дар шаҳри Хуҷанд» созишномаҳои грантӣ ба имзо расиданд.

Созишномаҳои мазкурро аз ҷониби Ҷумҳурии Тоҷикистон Вазири молияи Ҷумҳурии Тоҷикистон Файзиддин Қаҳҳорзода ва аз ҷониби Бонки Аврупоии Таҷдид ва Рушд Намояндаи доимии Бонки мазкур дар Ҷумҳурии Тоҷикистон Айтен Рустамова  ба имзо расониданд.

Маблағи умумии созишномаҳои ба имзорасида 7 млн. доллари амрикоиро ташкил дода, аз он 5 млн. доллар аз ҳисоби маблағҳои грантии Дафтари Швейтсария оид ба ҳамкории иқтисодӣ (SECO) барои татбиқи лоиҳаи «Рушди нақлиёти ҷамъиятӣ дар шаҳри Хуҷанд» ва 2 млн доллар барои татбиқи лоиҳаи «Идоракунии партовҳои сахти маишии шаҳри Кӯлоб» аз ҳисоби маблағҳои грантии Иттиҳоди Аврупо равона мегардад.

Мақсади асосии Лоиҳаи «Идоракунии партовҳои сахти маишии шаҳри Кӯлоб»- ин ҷорӣ намудани технологияи муосири идоракунии партовҳои сахти маишӣ, усулҳои нави ҷамъоварӣ ва баровардани партовҳо, баланд бардоштани сатҳу сифати хизматрасонӣ, беҳтаргардонии вазъи санитарӣ ва экологии шаҳри Кӯлоб мебошад.

Ҳадафи Лоиҳаи «Рушди нақлиёти ҷамъиятӣ дар шаҳри Хуҷанд»- ин беҳтар намудани сифати хизматрасонии нақлиёти ҷамъиятии шаҳри Хуҷанд буда, дар доираи он харидории автобусҳои замонавӣ ба нақша гирифта шудааст.