Сокинони деҳаи Лавоваи ҷамоати деҳоти Даҳанаи шаҳри Кӯлоб бо оби ошомиданӣ таъмин гардиданд

Июль 10, 2020 13:10

КӮЛОБ, 10.07.2020. /АМИТ «Ховар»/. Дар доираи татбиқи барномаҳои давлатӣ ва амалишавии  барномаи «Даҳсолаи об барои рушди устувор, барои солҳои 2018-2020» сокинони деҳаи Лавоваи ҷамоати деҳоти Даҳанаи шаҳри Кӯлоб, ки он яке аз деҳаҳои калонтарин маҳсуб мешавад ва зиёда аз 2000 ҳазор аҳолӣ дорад бо оби ошомиданӣ таъмин гардиданд.

Сокини деҳаи Лавова Майрамбӣ Одинашоева ба хабарнигори АМИТ «Ховар» чунин иброз дошт, «мо, сокинони ин деҳа, дар дастрасӣ ба оби ошомиданӣ танқисӣ мекашидем. Мо аз Ҳукумати Тоҷикистон, бахусус аз таваҷҷуҳ ва ғамхориҳои Пешвои миллат муҳтарам Эмомалӣ Раҳмон баҳри таъмини шароит ҷиҳати некуаҳволии мардуми Тоҷикистон беҳад миннатдорем. Чунки маҳз бо дастуру супоришҳои Сарвари давлат на танҳо ба деҳаи мо, балки ба даҳҳо  макони дигари мамлакат, ки аз оби ошомиданӣ танқисӣ доштанд ва онро аз роҳи дур меоварданд, хати оби нӯшокӣ кашида шуд. Мегӯянд, ки обу ободонӣ. Акнун мо имкони дар заминҳои наздиҳавлигӣ парвариш кардани сабзавот ва дарахтонро дорем, ки барои баланд гардидани сатҳи зиндагии мо мусоидат менамояд».

Ёдрас мешавем, ки дар деҳаи мазкур як чоҳи амудӣ дар чуқурии 80 метр канда, иншооти обтаъминкуни бунёд карданд. Дар расми ифтитоҳи он роҳбарияти мақомоти иҷроияи ҳокимияти давлатии шаҳри Кӯлоб, намояндагони шарикони рушд ва сокинони деҳа иштирок намуданд.

Иттилоъ дода шуд, ки иншоот аз чоҳи амудӣ, обанбор бо ғунҷоиши 25 метри кубӣ, шабакаи тақсимоти об ва 315 обченкунак иборат  аст. Илова гардид, ки иншоот ба тамоми талаботи санитарию эпидимиологӣ ҷавобгӯ буда, қойидаҳои бехатарӣ  ва беҳдоштӣ дар он  риоя карда шудааст. Бо истифодаи самаранок сокинон метавонанд 24 соат бо оби ошомиданӣ таъмин бошанд. Ташкилоти обрасон бошад гурӯҳи махсуси таъмирӣ ташкил кардааст, ки ҳамаи садамаҳои дар иншоот ба вуқӯъ пайвастаро сари вақт бартараф менамояд. Иншооти мазкур дар шаҳри Кӯлоб аввалин набуда, дигар сокинони деҳаҳо аз чунин иншооти обрасонӣ истифода бурда истодаанд.

Бартарии иншооти мазкур дар он аст, ки дар хатҳои оби нӯшокии ҳамаи муштариён ҳисобкунакҳои обӣ насб карда, маблағи истифодаи он сари вақт супорида мешавад. Аз ин рӯ, сокинон аз он самаранок истифода бурда, пеши роҳи талафёбии обро мегиранд.

Дар оянда таъмини дигар деҳаҳои шаҳри Кӯлоб бо оби ошомиданӣ ба нақша гирифта шудааст.

 

АКС аз бойгонӣ

Июль 10, 2020 13:10

Хабарҳои дигари ин бахш

Раиси Суди Олии иқтисодии Тоҷикистон ба тарбиятгирандагони ноҳияи Спитамен кумак намуд
ОБУ ҲАВО: Имрӯз дар Тоҷикистон ҳавои тағйирёбандаи бебориш дар назар аст
ОБУ ҲАВО: Имрӯз дар Тоҷикистон ҳавои тағйирёбанда дар назар аст
Сохтакорон шиносномаи қалбакии муоинаи техникии нақлиётро бо арзиши 500 сомонӣ мефурӯхтаанд
ОБУ ҲАВО: Имрӯз дар шаҳри Душанбе ҳаво 33+35 дараҷа гарм мешавад
ОБУ ҲАВО: Имрӯз дар шаҳри Душанбе ҳаво 32+34 дараҷа гарм мешавад
Шабакаҳои барқи шаҳри Конибодом ба давраи зимистон ҳамаҷониба омода мешаванд
Дар Кӯлоб Намоиши нигоҳдории растаниҳои худрӯй доир гардид
ОБУ ҲАВО: Имрӯз дар Тоҷикистон ҳавои тағйирёбанда дар назар аст
Ҳамоиши олимон ва дорандагони Ҷоизаи ба номи Исмоили Сомонӣ
ОБУ ҲАВО: Имрӯз дар Тоҷикистон ҳаво камабри тағйирёбанда мешавад
Пешвои миллат: «475 оилаи хизматчиёни ҳарбии Гвардияи миллӣ бо манзили истиқоматӣ ва 65 хонавода бо қитъаҳои замин барои сохтмони хона таъмин карда шудаанд»