Клубҳои шабона, барҳо ва тарабхонаҳо дар Швейтсария макони асосии сироятёбӣ бо коронавирус шудаанд

ДУШАНБЕ, 03.08.2020. /АМИТ «Ховар»/. Тақрибан нисфи сироятёбиҳои нав бо коронавирус дар Швейтсария ба клубҳои шабона, сеяки онҳо ба барҳо ва тарабхонаҳо рост меояд, хабар медиҳад АИБ «Казинформ» бо истинод ба The Local.

Таҳқиқоти тозаи Раёсати федералии тандурустии Швейтсария нишон медиҳад, ки чӣ гуна коронавирус дар саросари кишвар тавсеа меёбад ва зимнан клубҳои шабона, барҳо ва тарабхонаҳо макони асосии сироятёбӣ мебошанд.

Омори пешниҳоднамудаи ширкати ҷамъиятии телевизионии Швейтсария нишон медиҳад, ки 42% ҳолатҳои нави сироятёбӣ дар ин кишвар  дар ду ҳафтаи охир дар клубҳои шабона рух додаанд.

Боз 27% ҳолатҳои сироятёбӣ  ба барҳо ва тарабхонаҳо рост меоянд. Ин маънои онро дорад, ки аз се ду ҳиссаи тамоми сироятёбиҳо дар ин давра дар клубҳои шабона ё муассисаҳои хӯроки умумӣ сурат гирифтааст. Дар айни замон, аз аъзои оила каме беш аз 12%  ва аз кормандони тиббӣ — 8% одамон сироят ёфтаанд.

Ин хабар дар пасманзари эътирофи мансабдорони Швейтсария дар бораи он ки ба клубҳои шабона хеле барвақт иҷозати фаъолият дода шуда буд, арзи вуҷуд намуд. Аз  замоне, яъне  8 июн дар Швейтсария ба клубҳои дорои имкони қабули то 300 нафар меҳмон дубора иҷозати фаъолият дода шуд, чандин хуруҷи бемори рух дод ва садҳо тан одамон ба карантин фаро гирифта шуданд.

Як қатор кантонҳо аллакай шумораи одамонеро, ки иҷозати ба клубҳои шабона рафтан доранд, коҳиш додаанд ва ин дар ҳолест, ки баъзе муасссисаҳои фароғатӣ муштариёнро муваззаф кардаанд, ки ниқоб бипӯшанд.

Тамоми мизоҷони клубҳои шабона дар Швейтсария бояд мисли пештара дар фосилаи 1,5 метр аз ҳамдигар қарор дошта бошанд.

Бояд тазаккур  дод, ки Созмони умумиҷаҳонии тандурустӣ  тасдиқ мекунад, ки дар ҳафтаҳои охир дар Аврупо авҷи хуруҷҳои нави ҳолатҳои коронавирус мушоҳида шудааст ва дар он ҷо ҷавонон ҳангоми рухсатӣ ба барҳо мераванд, дар ҷойҳои оббозӣ шабнишиниҳо ташкил ва  бо теъдоди зиёди  рафиқонашон мулоқот мекунанд.

АКС аз сомонаи «Казинформ»