Дар Данғара 11 нафар узви ду оила аз истеъмоли консерваи хонагӣ заҳролуд гаштаанд

Ноябрь 3, 2020 14:00

ДУШАНБЕ, 03.11.2020. /АМИТ «Ховар»/. Дар деҳаи Меҳргони ҷамоати И.Шарипови ноҳияи Данғара дар натиҷаи истеъмоли консерваи бодиринг ва помидори дар шароити хона тайёркардашуда 11 нафар узви ду оила заҳролуд гардида,  9 нафари онҳо фавран дар беморхонаи ноҳияи Данғара бистарӣ карда шуданд. 

Дар ин бора АМИТ «Ховар» бо истинод ба маркази матбуоти Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон хабар медиҳад.

Бар асари истеъмоли консерваи бодиринг ва помидор як нафар узви оила, ки 23 сол дошт, 1 ноябр дар беморхона  фавтид. Ҳолати се нафари дигари заҳролудшуда, ки аз 15 то 47 сол доранд, вазнин арзёбӣ мешавад.

Вазъи саломатии  5 нафари дигар беҳтар шуда, онҳо таҳти назорат ва муолиҷа қарор доранд.

Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон ба сокинони мамлакат муроҷиат мекунад, ки зимни омода намудани консерваҳо талош намоянд қоидаҳои бехатариро риоя намуда, аз истеъмоли консерваҳои рангашон тира шуда ё шубҳаовар худдорӣ намоянд.

Тавре профессори кафедраи «Технологияи нигоҳдорӣ ва коркарди маҳсулоти кишоварзӣ»-и Донишгоҳи аграрии Тоҷикистон ба номи Шириншоҳ Шоҳтемур Рустам Бобохонов иброз намуд, зимни консерва намудан бонувон бояд диққати асосиро ба тозагӣ ва безараргардонии ашёе, ки дар он маҳсулот захира мешавад, равона намоянд.

Ба гуфти ҳамсуҳбати мо, дар баъзе ҳолатҳо занон зарфҳои шишагинро дар нури офтоб хушк мекунанд, ки ин амал барои захира ва нигоҳдории дуру дароз кафолати пурра дода наметавонад. Зеро як қисми зарфи шишагин дар офтоб асту ба қисми дигар нури офтоб намерасад. Дар ин ҳолат дар як қисми он зараррасонҳо боқӣ мемонанду ба маҳсулоти дохили зарф таъсир мерасонанд, ки дар натиҷа захира қобилияти нигоҳдории худро гум мекунад.

Инчунин зарф ва сарпӯши онро дар муддати 10-15 дақиқа дар буғи оби гарм безарар намудан шарт ва зарур аст. Намнокӣ барои нигоҳдории консерва, нӯшоба ва мураббо бояд аз 70 фоиз зиёд набошад, зеро сарпӯши зарф оҳанӣ буда, занг заданаш мумкин аст. Он дар натиҷа ба маҳсулоти дохили зарф зарари худро мерасонад, ки ин гуна консерва барои истеъмол тавсия дода намешавад.

Ноябрь 3, 2020 14:00

Хабарҳои дигари ин бахш

Пешгирии бемориҳои сироятӣ масъулияти ҳар шаҳрванд аст
Дар Пекин масъалаҳои рушди қонунгузорӣ ва таҷрибаи муосири давлатдорӣ баррасӣ гардиданд
Дар Москва ҷаласаи 11-уми Алянси Авруосиёии омбудсменҳо баргузор гардид
Бахшида ба Рӯзи Президент дар вилояти Суғд роҳпаймоии идона баргузор шуд
Ҳамкории ҳуқуқии Тоҷикистону Чин дар Пекин баррасӣ гардид
Рӯзи Президентро дар ноҳияи Ёвон бо баргузории чорабиниҳои гуногун таҷлил намуданд
Ба муносибати Рӯзи Президент ва Иҷлосияи XVI Шурои Олӣ дар бинои Ҳукумати  Ҷумҳурии Тоҷикистон ҷамъомад баргузор шуд
Дар мавзуи «Низоми идоракунии президентӣ ва таъмини амнияти давлатӣ» ҳамоиши илмӣ-амалӣ доир шуд
Дар мақомоти Ваколатдор оид ба ҳуқуқи инсон бахшида ба Рӯзи Президенти Тоҷикистон ҳамоиш баргузор шуд
СИЁСАТИ ХОРИҶИИ ТОҶИКИСТОН – НАМУНАИ ДИПЛОМАТИЯИ МУТАВОЗИНУ СОЗАНДА. Эҳдо ба Рӯзи Президенти Ҷумҳурии Тоҷикистон
Дар Душанбе таҳти унвони «Президент — симои миллат ва рамзи давлат» ҳамоиши ҷумҳуриявӣ доир шуд
РӮЗИ ПРЕЗИДЕНТ ВА ТАҶАССУМИ ИРОДАИ ТАЪРИХИИ МИЛЛАТ ДАР БУНЁДИ ДАВЛАТДОРИИ НАВИН. Мулоҳизаҳои академик Фарҳод Раҳимӣ