ҶАБҲАИ БУЗУРГИ СОЗАНДАГӢ ДАР ШАҲРУ ДЕҲОТИ ТОҶИКИСТОН. Моҳи ноябр дар Рашт 25 иншооти гуногун мавриди баҳрабардорӣ қарор гирифтанд

Декабрь 22, 2020 11:39

 РАШТ, 21.12.2020 /АМИТ «Ховар»/. Бахшида ба 30-солагии Истиқлоли давлатии Ҷумҳурии Тоҷикистон имсол дар соҳили дарёи Сорбоғи ноҳияи Рашт аз тарафи соҳибкори маҳаллӣ Мирзохуҷа Ғиёсов коргоҳи истеҳсоли сангу шағал бунёд гардид. То ин  давра дар ин мавзеъ чунин коргоҳи сангу шағалмайдакунӣ набуд. Дар назар аст, ки дар оянда коргарони ин коргоҳ сохтмонҳои ноҳияро  бо ин гуна масолеҳ таъмин намоянд.

Тавре мухбири минтақавии АМИТ “Ховар” иттилоъ медиҳад, бахшида ба ҷашни 30-солагии Истиқлоли давлатӣ дар ноҳияи Рашт бунёди 315 иншооти таъйиноташон гуногун ба нақша гирифта шудааст. Танҳо моҳи ноябри имсол  25 адад иншооти гуногун мавриди баҳрабардорӣ қарор гирифтанд. Иншооти ҷашнӣ асосан аз ҳисоби маблағҳои мақомоти маҳаллӣ ва соҳибкорону аҳолӣ сохта мешаванд.

Соли равон ба ифтихори  Рӯзи Президенти Ҷумҳурии Тоҷикистон дар ноҳия 14 иншооти таъйиноти гуногун бо иштироки меҳмонону сокинони ноҳия мавриди баҳрабардорӣ қарор дода шуданд. Иншооти баистифодадодашуда  китобхона, майдончаи варзишӣ, дорухона, бунгоҳи тиббӣ, бинои иловагии муассисаи таълимии рақами 33-и ноҳия барои 300 нафар хонанда дар ду баст, корхонаи истеҳсоли хишти пухта бо иқтидори сад ҳазор дона дар як ҳафта ва марказҳои хизматрасонию соҳилмустаҳкамкунии дарёҳои Сурхобу Сорбоғ буда,  асосан аз ҳисоби маблағҳои мақомоти маҳаллӣ ва соҳибкорону аҳолӣ бунёд шудаанд.

Ҳамчунин соли 2020 ба шарафи ҷашни 30-солагии Истиқлоли давлатӣ ҷавонони деҳаи дурдасти Лангараки Ҷамоати деҳоти Қалъаи сурх, ки  солҳо боз ба майдончаи варзишии замонавӣ эҳтиёҷ доштанд, бо саҳми соҳибкорони маҳаллӣ ва дастгирии  аҳолии деҳа дар муддати ду моҳ соҳиби майдончаи замонавии варзишӣ гардиданд. Акнун ҳамарӯза даҳҳо нафар ҷавонон дар ин майдонча ба намудҳои гуногуни варзиш машғул шуда, маҳорати худро боз ҳам сайқал медиҳанд.

Моҳи июли соли равон бо дастгирии молиявии Вазири корҳои дохилии Ҷумҳурии Тоҷикистон, генерал-полковники милитсия Рамазон Раҳимзода  дар маҳаллаи  Рашти шаҳраки Ғарми ноҳияи Рашт дар муддати кӯтоҳ чоҳи амудӣ  ба истифода дода шуд, ки чуқурии чоҳ  86 метр буда, дар сохтмони он 220 ҳазор сомонӣ масраф гардидааст.

Раиси маҳаллаи  Рашти шаҳраки Ғарм Зикрулло Ҳайдаров иброз дошт,  ки  бо оби нӯшокӣ таъмин гардидан орзуи чандинсолаи 120 хоҷагии ин маҳалла буд. Хушбахтона, бо ташаббуси Вазири корҳои дохилӣ ва ёрдами сокинони ин маҳалла орзуи дерини сокинон ҷомаи амал пӯшид. Дар баробари ба истифода додани чоҳи амудӣ, роҳҳои мошингарди дохили маҳалла ҳамвор ва сангфарш карда шуданд. Соли гузашта роҳе, ки маҳалларо бо шоҳроҳ мепайвандад, бо кумаки Вазорати корҳои дохилӣ дар масофаи зиёдтар аз ду километр мумфарш гардид.

Соли 2020 барои сокинони деҳаи Шули Ҷамоати деҳоти Нусратулло Махсуми ноҳияи Рашт хотирмон буд, зеро 2 километр роҳи мошингарди деҳа  бо иқдоми соҳибкорон асфалтпӯш гардид. Инчунин ба истифода додани се истгоҳ дар шаҳраки Ғарму деҳаи Ҷафр ва Мулло Барот, чароғон намудани кӯчаи деҳаи Ҳоит, таъмири канали Туркон ва сохтмони осиёби обӣ дар деҳаи Ҳиҷборак аз ташаббусҳои ватандӯстонаи соҳибкорони маҳаллӣ  мебошад.

Декабрь 22, 2020 11:39

Хабарҳои дигари ин бахш

«ИФТИХОРИ ВАТАНДОРӢ». Дар Хатлон ба ифтихори 35-солагии Истиқлолияти давлатӣ маҷмуаи мақолаҳо ба табъ расид
ОБОДИИ ВАТАН АЗ ОБОДИИ МАҲАЛ ОҒОЗ МЕГАРДАД. Дар деҳаи Навободи шаҳри Турсунзода 3 км роҳ навсозӣ карда мешавад
НАМУДҲОИ МИЛЛИИ ВАРЗИШ. Дар Ёвон Фестивали бозиҳои миллии варзишӣ доир гардид
Дар Муассисаи таълимии деҳаи Даҳкати ноҳияи Деваштич синфхонаҳои иловагӣ ба истифода дода шуд
БА ИСТИҚБОЛИ 35-СОЛАГИИ ИСТИҚЛОЛИ ДАВЛАТӢ. Дар шаҳраки Адрасмони Гулистон мумфаршкунии роҳи мошингард оғоз ёфт
ОБОДӢ ДАР МАҲАЛ. Роҳи деҳаи Аҷами ноҳияи Шаҳринав асфалтпӯш гардид
БАХШИДА БА 35-СОЛАГИИ ИСТИҚЛОЛИЯТИ ДАВЛАТӢ. Дар шаҳри Роғун бинои кӯдакистон ва «Амонатбонк» ба истифода дода мешавад
Дар Хоруғ ғолибони даври вилоятии Озмуни «Беҳтарин шаҳру ноҳия, шаҳраку деҳот, маҳаллаи аҳолинишин ва хонаи истиқоматӣ» муайян гардиданд
Сокинони деҳаи Панҷосиёби Ҷамоати Зарбдори шаҳри Кӯлоб соҳиби бинои иловагии муассисаи таълимӣ мегарданд
ОБОДОНӢ ДАР МАҲАЛ. Дар деҳаи Обшорони Ҷамоати деҳоти Навободи шаҳри Турсунзода 1,5 км роҳи байнидеҳавӣ асфалтпӯш гардид
Зиёда аз як километр роҳи дохилии деҳаи Даҳбеди ноҳияи Шаҳринав асфалтпӯш гардид
БА ИСТИҚБОЛИ 35-СОЛАГИИ ИСТИҚЛОЛИЯТИ ДАВЛАТӢ. Дар шаҳри Кӯлоб беш аз 400 иншооти таъйиноти гуногун бунёд мегардад