Ҷаласаи Шӯрои ҳамоҳангсозӣ оид ба пешгирии суиистеъмоли маводи нашъадор баргузор гардид

ДУШАНБЕ, 17.12.2020. /АМИТ «Ховар»/. Имрӯз  бо ташаббуси Агентии назорати маводи нашъаовари назди Президенти Ҷумҳурии Тоҷикистон дар Муассисаи давлатии “Китобхонаи миллии Тоҷикистон”  ҷаласаи Шӯрои ҳамоҳангсозӣ оид ба пешгирии суиистеъмоли маводи нашъадор таҳти раёсати Раиси Шӯрои ҳамоҳангсозӣ-муовини Сарвазири Ҷумҳурии Тоҷикистон  Матлубахон Сатториён баргузор гардид. Дар кори он муовини раиси Шӯро-директори Агентии назорати маводи нашъаовари назди Президенти Ҷумҳурии Тоҷикистон Ҳабибулло Воҳидзода ва муовини Вазири тандурустӣ ва ҳифзи иҷтимоии аҳолии Ҷумҳурии Тоҷикистон Ғафур Муҳсинзода, аъзои Шӯро аз ҳисоби роҳбарони вазорату идораҳои дахлдори ҷумҳурӣ иштирок намуданд.

Хабарнигори АМИТ «Ховар» иттилоъ  медиҳад, ки дар кори   ҷаласа якчанд масъалаҳо мавриди баррасӣ   қарор дода шуданд. Аз ҷумла, оид ба ҳамкории вазорату идораҳо дар соҳаи мубориза бо муомилоти ғайриқонунии маводи нашъадор  ва назорати муомилоти қонунии онҳо; оид ба масъалаҳои мусоидат ба дастрасии воситаҳои нашъадор ва моддаҳои корҳои тиббӣ ва илмӣ, ки таҳти назорати байналмилалӣ қарор доранд, инчунин пешгирии ҳодисаҳои аз муомилоти қонунӣ ба муомилоти ғайриқонунӣ гузаштани онҳо; вобаста ба мушкилоти мақомоти ҳифзи ҳуқуқ дар мавриди муайян намудани миқдори дорувори сахттаъсир ва заҳролуд ва маълумот оид ба иҷрои   қарорҳои Протоколи ҷаласаи Шӯро аз 12 феврали соли 2019, 15 августи соли 2019 ва оид ба натиҷаи иҷрои нақшаи фаъолият дар соли 2019, инчунин фаъолияти нуҳ моҳи соли 2020

Оид ба масъалаи якум Директори Агентии назорати маводи нашъаовари назди Президенти Ҷумҳурии Тоҷикистон, муовини раиси  Шӯро Ҳабибулло Воҳидзода,  доир ба масъалаи дуюм муовини  Вазири тандурустӣ ва ҳифзи иҷтимоии аҳолии Ҷумҳурии Тоҷикистон Ғафур Муҳсинзода ва оид ба масъалаи сеюми рӯзномаи ҷаласа  узви Шӯро, муовини якуми Вазири корҳои дохилӣ Абдураҳмон Аламшозода сухан гуфтанд.

Пас аз анҷоми суханрониҳо доир ба масъалаҳои болозикр мубодилаи афкор сурат гирифт.

Мақсади баргузории  ҷаласаи Шӯро  ба ҳам овардани шахсони масъул дар соҳаи наркологӣ ва пешгирии нашъамандӣ, ба роҳ мондани ҳамкорӣ ва ёрии ҳамдигарӣ дар пешгирии нашъамандӣ, пешниҳод намудани маълумоти дақиқ оид ба шумораи шахсони нашъманд, пайдо кардани маълумот оид ба иҷрои қарорҳои Шӯрои ҳамоҳангсозӣ оид ба пешгирии суиистеъмоли маводи нашъадор мебошад.

Фаъолияти минбаъдаи нақшаи Шӯрои ҳамоҳангсозӣ оид ба пешгирии суиистеъмоли маводи нашъадор дар соли 2021 тасдиқ гардида, доир ба дигар масъалаҳои муҳокимашуда қарорҳои дахлдор қабул карда шуданд.

София ШОИК,
АМИТ “Ховар”