БО АҲЛИ ХОНАДОН. Дар Ӯзбекистон ҷамъомадҳои дастаҷамъонаи солинавӣ манъ карда шуданд
![](https://khovar.tj/wp-content/uploads/2020/12/novyj-god-banket.jpg)
ДУШАНБЕ, 14.12.2020 /АМИТ «Ховар»/. Дар Ӯзбекистон гузаронидани чорабиниҳои гуногуни дастаҷамъонаи солинавӣ барои вазорату идораҳо, корхонаҳои давлатӣ ва дигар ташкилот манъ карда шуд. Тавре АМИТ «Ховар» бо истинод ба хадамоти матбуоти Вазорати тандурустии Ҷумҳурии Ӯзбекистон хабар медиҳад, қарори дахлдорро Комиссияи махсуси ҷумҳуриявӣ бо мақсади пешгирии паҳншавии COVID-19 қабул кардааст.
Тибқи қарор тавсия дода мешавад, ки маблағҳои аз ҳисоби барномаҳои дастаҷамъона сарфашуда ба соҳаҳои маориф, тандурустӣ, ятимхонаҳо ва дигар соҳаҳои иҷтимоӣ равона карда шаванд.
Зикр карда мешавад, ки ин маҳдудият ба баргузории ҷамъомадҳои идона дар тарабхонаҳо, қаҳвахонаҳо ва дигар муассисаҳои хӯроки умумӣ бо шумораи на бештар аз 30 нафар, бо риояи қатъии талаботи санитарию гигиенӣ ва карантин дахл надорад.
Ба шаҳрвандон тавсия дода мешавад, ки Соли нави 2021-ро дар хона таҷлил намоянд.
Бо дарназардошти тавсияҳои СУТ ва таҷрибаи мусбати кишварҳои хориҷӣ дар мубориза бо сирояти коронавирус тақвият бахшидан ба истифодаи оммавии ниқобҳо дар ҷойҳои ҷамъиятӣ ба нақша гирифта шудааст.
Қаблан хабар дода шуда буд, ки дар мактабҳои миёнаи Ӯзбекистон барномаҳои солинавӣ бо иштироки хонандагон баргузор нахоҳанд шуд.
Дар Ӯзбекистон имрӯз шумораи умумии сироятёфтагон аз коронавирус 74 ҳазору 956 нафарро ташкил медиҳад. То имрӯз 72 ҳазору 243 бемор (97%) аз коронавирус шифо ёфтаанд, 612 нафар фавтида, 2 ҳазору 101 нафар табобат гирифта истодаанд.
АКС аз бойгонӣ