Дар Хоруғ ғолиби озмуни «Фурӯғи субҳи доноӣ китоб аст» — Шарифамоҳ Одинамаҳмадоваро самимона истиқбол гирифтанд

Декабрь 26, 2020 09:19

ХОРУҒ, 26.12.2020 /АМИТ  «Ховар»/. Хонандаи Литсеи Оғохони шаҳри  Хоруғ  Шарифамоҳ Одинамаҳмадова дар Озмуни ҷумҳуриявии «Фурӯғи субҳи доноӣ китоб аст», дар номинатсияи осори адибони ҷаҳон ғолиби  ҷои сеюм ва соҳиби диплому ифтихорнома ва мукофоти пулӣ дар ҳаҷми 15 ҳазор сомонӣ  гардид. Хонандагону омӯзгорони литсей  Шарифамоҳро хеле гарму самимӣ истиқбол гирифтанд.

Директори литсей Давлатназар Худоназаров зимни табрики шогирдон изҳор дошт, ки «ин озмун бо иқдоми фарҳангпарваронаи Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон Эмомалӣ Раҳмон баргузор гардид ва ҳадафи он баланд бардоштани завқи китобхонӣ, дарёфти чеҳраҳои нави сухандону суханшинос ва суханпарвар мебошад. Пирӯзии Шарифамоҳ-  ин ифтихори кулли  омӯзгорону хонандагони Литсеи мо ва албатта,  волидонашон аст. Ман умедворам, ки пас аз ин сафи дӯстдорони китоб, илму фарҳанг дар муассисаи мо бамаротиб афзоиш хоҳад ёфт».

Мулоқоти Шарифамоҳ бо ҳамсабақонаш  дар китобхонаи ин муассисаи таълимӣ баргузор гардид. Бояд зикр кард, ки он дар байни муассисаҳои талимии мамлакат яке аз китобхонаҳои калонтарин ба шумор рафта, дар махзани дониш қариб 50 ҳазор  китобҳои дарсӣ, илмию бадеӣ бо забонҳои тоҷикӣ, русию англисӣ ва фаронсавию арабӣ  гирдоварӣ шудаанд. Шарифамоҳ вақти бештари худро дар ҳамин китобхона мегузаронад. Мавсуф дар суҳбат бо ҳамсинфонаш гуфт, ки  “агар ҳар яки шумо вақти холии худро дар ҳамин китобхона сипарӣ кунед, на танҳо дар озмун, балки дар шоҳроҳи ҳаёт низ ба пирӯзӣ ноил мешавед”.

Хонандаи ҳамин муассисаи таълимӣ Муқаддаси Мухтор гуфт, ки “11 сол  бо Шарифамоҳ дар як синф таҳсил мекунад ва ӯ дар баробари ҳамсинфи хуб будан ҳамчунин дугонаи содиқу вафодор низ аст. Дар ғаму шодии ҳамсинфонаш мудом шарик аст ва дар лаҳзаҳои зарурӣ бароямон  кумак мерасонаду ҳам дилбардорӣ мекунад. Ҳарчанде ки дар гурӯҳи англисӣ таҳсил мекунад, аммо бо забони тоҷикӣ хеле равону озод суҳбат мекунад ва аз осори шоирону нависандагони классикию муосири тоҷик садҳо асар мутолиа кардаву соатҳо метавонад дар бораашон қисса кунад”.

Шарифамоҳ Одинамамадова гуфт, ки баъди хатми муассисаи таҳсилоти миёнаи умумӣ тасмим гирифтааст, ки таҳсили худро дар яке аз донишгоҳҳои бонуфузи Амрико идома диҳад.

Ёдовар мешавем, ки 5 феврали соли равон  амри Президенти Ҷумҳурии Тоҷикистон дар бораи баргузор кардани озмуни «Фурӯғи субҳи доноӣ китоб аст» ба ифтихори 30-солагии Истиқлоли давлатии  Ҷумҳурии Тоҷикистон ба имзо расид. Барои дар сатҳи баланд баргузор кардани ин озмун аз фонди захиравии Президенти Ҷумҳурии Тоҷикистон зиёда аз якуним миллион сомонӣ ҷудо шуд. Ҳамаи иштирокчиёни даври ниҳоӣ бо диплому ифтихорнома ва мукофоти пулӣ сарфароз гардонида шуданд.

Декабрь 26, 2020 09:19

Хабарҳои дигари ин бахш

Дар Сарраёсати ҳифзи муҳити зист дар шаҳри Душанбе Маркази мониторинги камераҳои мушоҳидавӣ фаъол гардид
Имрӯз дар Тоҷикистон ҳаво тағйирёбанда шуда, борон ва раъду барқ пешгӯӣ мешавад
Дар ноҳияи Файзобод бо фаъолону собиқадорон ва ходимони дини деҳоти Чашмасор мулоқот доир гардид
Дар ду қисми низомии тобеи Вазорати корҳои дохилии Тоҷикистон дастархони идона ороста гардид
Дар ноҳияи Деваштич маъракаи кишти картошка оғоз шуд
Иҷлосияи нуздаҳуми Маҷлиси вакилони халқи вилояти Хатлон, даъвати шашум доир гардид
Дар пайравӣ ба амалҳои хайрхоҳонаи Президенти Тоҷикистон дар якчанд қисми ҳарбӣ дастурхони идона ороста шуд
Дар Неругоҳи барқи обии «Норак» ҷашни байналмилалии Наврӯз бо шаҳомати хосса таҷлил гардид
Имрӯз дар Тоҷикистон ҳаво тағйирёбанда шуда, борон ва раъду барқ пешгӯӣ мешавад
Наврӯз ҳамчун ҷашни эҳёи табиат истифодаи оқилонаи заминро талқин менамояд
Кишоварзони ноҳияи Зафаробод дар 120 гектар картошкаи барвақтӣ кишт менамоянд
Дар Агентии содироти Тоҷикистон бо намояндагони Агентии назорати давлатии молиявӣ ва мубориза бо коррупсия вохӯрӣ доир шуд