СУТ дар бораи он ки намуди нави COVID-19 ба раванди беморӣ шиддат мебахшад, ягон далел надорад

ДУШАНБЕ, 22.12.2020 /АМИТ «Ховар»/. Созмони умумиҷаҳонии тандурустӣ  (СУТ) оид ба он ки намуди нави COVID-19 раванди  бемориро  шиддат мебахшад, ҳеҷ далел надорад. Тавре  АМИТ «Ховар» бо истинод ба Хадамоти ахбори СММ хабар медиҳад, дар ин бора директори Барнома оид ба ҳолатҳои фавқулодаи СУТ Майкл Райан (ДАР АКС) дар брифинг зимни шарҳи вазъи вобаста ба штамми нав ибрози назар  кардааст.

«Дар айни замон ягон далеле дар бораи зиёд шудани вазнинӣ вобаста ба ин  беморӣ вуҷуд надорад», — изҳор дошт Майкл Райан.

Пештар маълум шуд, ки дар Британияи Кабир мутатсияи нави коронавируси SARS-CoV-2 ошкор шудааст.  19 декабр Шӯрои машваратии Британия оид ба таҳдиди вирусҳои роҳҳои нафаскашии нав ва пайдошаванда тасдиқ кард, ки варианти коронавируси дар кишвар ошкоршуда бо суръати бештар паҳн мешавад ва аз аҳолӣ эҳтиёткории бештар талаб намуд.

Паҳншавии босуръати штамми нави коронавирус боиси ворид намудани маҳдудият (локдаун) дар Лондон ва ҷанубу шарқи Англия гардид. Шӯрои илмӣ, ки ба мақомоти Британия маслиҳат медиҳад, «бо саҳми муайяни итминон» иброз медорад, ки штамми нав назар ба штаммҳои пешина аз одам ба одам осонтар интиқол меёбад, менависад “Би-би-си”.

Гарчанде ки варианти нави вирус, тибқи арзёбиҳои пешакӣ, метавонад нисбат ба варианти маъмулӣ 70% бештар сироятнок бошад, то ҳол дар бораи бештар хатарнок будани он аз ҷиҳати маргу мир ва  ё бистарӣ шудан дар беморхонаҳо чизе гуфтан маҳол аст.

Вазорати тандурустии Африқои Ҷанубӣ низ қаблан хабар дода буд, ки генетикҳо мутатсияи нави коронавирусро дар ин кишвар бо номи 501.V2 муайян кардаанд.

АКС аз бойгонӣ