Ӯзбекистон бо сабаби хуруҷи штамми нави коронавирус иртиботи ҳавоиро бо Британия ва чанд кишвари Иттиҳоди Аврупо мебандад

ДУШАНБЕ, 23.12.2020 /АМИТ «Ховар»/. Ӯзбекистон аз 21 декабри соли 2020 то 10 январи соли 2021 иртиботи ҳавоӣ (парвозҳои воридотӣ, содиротӣ ва транзитӣ) -ро бо Британия, Италия, Германия, Дания, Австрия, Австралия, Ҳолланд ва Африқои Ҷанубӣ  мебандад. Бино ба иттилои АМИТ «Ховар», Podrobno.uz дар ин бора бо истинод ба қарори Комиссияи махсуси ҷумҳуриявӣ хабар додааст.

Ин тасмим бо сабаби шиддати босуръати вазъи эпидемиологӣ дар ҷаҳон ва инчунин пешгирии пайдоиши манбаъҳои нави сирояти коронавирус дар кишвар қабул шудааст.

Шаҳрвандони Ӯзбекистон, ки тавассути кишварҳои сеюм ба Ӯзбекистон меоянд ва дар тӯли 14 рӯзи охир дар Британияи Кабир, Италия, Германия, Дания, Австрия, Австралия, Ҳолланд ва Африқои Ҷанубӣ будаанд, бояд карантини ҳатмии 14-рӯзаро дар меҳмонхона гузаранд.

Илова бар ин, шаҳрвандони кишварҳои зикршуда, шахсони бешаҳрвандӣ, ки доимо дар ин давлатҳо зиндагӣ мекунанд ва шаҳрвандони кишвари сеюм, ки дар ин давлатҳо истиқомат мекунанд ё давоми 14 рӯзи охир дар онҷо будаанд, зери таъсири ин маҳдудият қарор мегиранд ва ба онҳо иҷозат дода намешавад, ки дар тамоми ин муддат ба Ӯзбекистон ворид шаванд.

Маҳдудият тадриҷан ҳангоми ба эътидол омадани вазъи эпидемиологӣ дар ин кишварҳо бардошта хоҳад шуд.

                                                           АКС аз бойгонӣ