Дар Индонезия бар асари силсилаи заминҷунбиҳо 26 нафар ҳалок шуда, 600 тан осеб дидаанд

ДУШАНБЕ, 15.01.2021 /АМИТ «Ховар»/. Тайи як шабонарӯзи охир ҳадди ақалл 26 нафар қурбонии силсилаи заминҷунбиҳо дар Индонезия шуданд. Тавре АМИТ «Ховар» хабар медиҳад, имрӯз дар ин бора оҷонсии France-Presse (AFP) бо истинод ба хадамоти фавқулода хабар додааст.

  Қаблан Reuters хабар дода буд, ки дар тӯли шабонарӯзи гузашта ҳадди ақалл ҳафт нафар қурбони силсилаи заминларзаҳо дар Индонезия гардиданд ва қариб 600 нафар захмӣ шуданд. Тавре Агентӣ пештар бо истинод ба Агентии обуҳавошиносии Индонезия хабар дода буд, ба дунболи заминҷунбиҳои 5,7 ва 6,2-дараҷагӣ дар ҷазираи Сулавеси метавонанд пасларзаҳои шадид рух диҳанд.

Мутобиқи маълумоти он, дар сурате, ки таконҳои нави зеризаминӣ  нисбат ба онҳое, ки сабт шудаанд, шадидтар бошанд, таҳдиди сунамӣ вуҷуд дорад. Ҳавошиносони Индонезия гуфтаанд, ки онҳо аллакай беш аз 25 пасларзаро сабт кардаанд. Тавре портали Detik иттилоъ медиҳад, бо фармони президенти Индонезия Ҷоко Видодо, вазири корҳои иҷтимоӣ Три Рисмахарини ба музофоти офатзадаи Сулавеси Ғарбӣ рафтааст.

Қаблан Детик бо истинод ба маълумоти Агентии миллии мубориза бо офатҳои табиӣ иттилоъ дода буд, ки дар натиҷаи заминҷунбӣ ҳадди ақалл се нафар ҳалок ва 24 нафар маҷрӯҳ шудаанд. Тақрибан 2 ҳазор нафар дар Сулавеси Ғарбӣ маҷбур шуданд хонаҳои худро тарк кунанд. Офати табиӣ беш аз 60 бино, аз ҷумла дафтари волии маҳаллӣ ва бинои меҳмонхонаро хароб кардааст. Заминҷунбӣ инчунин боиси фаромадани якчанд ярч шудааст.

Агентии Франс Пресс бо истинод ба намояндаи хадамоти наҷотдиҳии  маҳаллӣ хабар дод, ки беш аз 10 нафар дар зери харобаҳои бинои фурӯрафтаи бемористон дар маркази маъмурии вилоят — шаҳри Мамуҷу қарор доранд.

Акси: © EPA-EFE/BASARNAS