Дар натиҷаи таркиши мина дар назди бинои полиси Ҳирот шаш сарбози полис маҷрӯҳ шуданд

ДУШАНБЕ, 21.01.2021 /АМИТ «Ховар»/ Мақомоти маҳаллӣ дар вилояти Ҳирот изҳор доштанд, ки шаби гузашта дар натиҷаи таркиши мина дар назди бинои полиси ин вилоят шаш сарбози полис маҷрӯҳ шуданд, хабар медиҳад АМИТ «Ховар» бо истинод ба сомонаи шабакаи телевизионии tolonews.com.

Абдул Аҳад Вализода, сухангӯи фармондеҳии полиси Ҳирот гуфт, ки ҳодиса тахминан соати 10:30-и шаби гузашта, 20.01.2021 дар наздикии пули Молон дар ноҳияи Инҷили ин вилоят рух додааст ва дар натиҷаи таркиш идораи полис комилан валангор шудааст.

Муҳаммад Рафиқ Шерзай, сухангӯи Раёсати тандурустии ҷамъиятии Ҳирот, гуфт, ки шаш сарбози маҷрӯҳшуда ба беморхона интиқол ёфтанд ва вазъи саломатии ҳамаашон хуб аст.

Дар ҳамин ҳол, сокинони маҳаллӣ мегӯянд, ки пас аз таркиш садои тирандозии шадидро шуниданд.

Пули Молон яке аз пулҳои таърихии Ҳирот аст, ки дар байни ноҳияҳои Инҷил ва Гузара дар болои дарёи Ҳарирӯд воқеъ шудааст.

Инчунин TOLOnews иттилоъ додааст, ки  дар шаҳри Тиринкути вилояти Урузгон дар натиҷаи таркиши мототсикл 11 нафар, аз ҷумла як рӯзноманигор маҷрӯҳ шуданд.

Мақомоти маҳаллӣ мегӯянд, ки таркиш дар чорроҳаи Ғозӣ Амануллоҳ пас аз нисфирӯзии сешанбе (19.01.2021) рух додааст.

Дар ҳамин ҳол, масъулони радиои “Салом Рӯзгон” мегӯянд, ки хабарнигори радио Шоҳ Муҳаммад Ҳамдард дар ин инфиҷор захмӣ шудааст.

Тибқи иттилои манбаъҳо, дар байни захмишудагон як зан ва ду кӯдак низ ҳастанд.

То ҳол масъулияти ин инфиҷорҳоро ҳеҷ гурӯҳе ба дӯш нагирифтааст.