15 ҷангҷӯи «Толибон» дар Бағлони Афғонистон кушта ва захмӣ карда шуданд

ДУШАНБЕ, 04.02.2021 /АМИТ «Ховар»/ Фармондеҳи полиси вилояти Бағлони Афғонистон изҳор доштааст, ки дар ҷараёни амалиёти муштараки неруҳои амниятӣ дар масири шоҳроҳи Бағлон-Самангон 15 ҷангҷӯи «Толибон» (мамнуъ дар Тоҷикистон) кушта ва захмӣ шуданд, хабар медиҳад АМИТ «Ховар» бо истинод ба агентии иттилоотии Khaama Press.

Фармондеҳи полиси вилояти Бағлони ҶИА Муҳаммад Вайс Самимӣ 3 феврал ба расонаҳо иттилоъ додааст, ки шоми дирӯз дар як амалиёти муштараки нируҳои амниятӣ дар мавзеи Чашмаи Шир дар шоҳроҳи Бағлон-Самангон ҳашт ҷангҷӯи толиб кушта ва ҳафт нафари дигар маҷрӯҳ шуданд.

Вай афзудааст, ки дар байни ифротиёни кушташуда як нафар аз сатҳи роҳбарии  гурӯҳ — Қорӣ Ҳафизуллоҳ низ ҳаст.

Дар ҳамин ҳол, Муҳаммад Самимӣ инчунин изҳор доштааст, ки дар деҳоти Вазирободи атрофи шаҳри Пули Хумрӣ чанд деҳа ва русто аз ҷангиёни толиб поксозӣ шуд.

Инчунин, фармондеҳи полиси вилояти Бағлон аз пешравӣ ва оғози амалиётҳои густардаи муштараки неруҳои амниятӣ дар тамоми нуқоти ин вилоят хабар додааст.

Аз ҷумла ӯ қайд мекунад, ки рӯзи гузашта низ дар як амалиёти муштараки неруҳои амниятӣ дар вилояти Бағлон беш аз 20 ҷангии «Толибон» кушта ва захмӣ шуданд.

Дар идомаи ноамниҳо дар вилояти Бағлон, Ёсин Зиё, раиси ситоди муштараки артиш ду рӯз пеш барои баррасии авзои амниятӣ ва таҳкими ҷабҳаҳои мубориза бар зидди «Толибон» ба ин вилоят ташриф овард.

Дар айни замон шабакаи телевизионии tolonews.com. бо истинод ба  узви шӯрои вилояти Сари Пул Асадулло Хуррам хабар додааст, ки 3 феврал зимни ҳамлаи “Толибон” ба посгоҳи артиш дар рустои Оқ қабраки вулусволии Гӯсфанди ин вилоят шаш тан аз неруҳои амниятӣ кушта ва ҳашт нафари дигар маҷрӯҳ шуданд.

Вай афзуд, ки дар даргириҳо шаш толиб низ кушта шудааст.