Дар ду рӯйдоди зидди амният дар Кобул ду тан ҷон бохтанд

ДУШАНБЕ, 09.02.2021 /АМИТ «Ховар»/ Шаҳри Кобули Афғонистон субҳи имрӯз (сешанбе, 9 феврал) бори дигар шоҳиди ду ҳодисаи зидди амниятӣ гардид, ки дар натиҷа ду тан ҷон бохтанд ва панҷ нафари дигар маҷрӯҳ шуданд, хабар медиҳад АМИТ «Ховар» бо истинод ба шабакаи телевизионии tolonews.com.

Манобеи амниятӣ гуфтанд, ки субҳи имрӯз афроди ношиноси мусаллаҳ як автомашинаро дар мавзеи Боғи Довуди ноҳияи панҷуми шаҳри Кобули ҶИА тирборон карданд, ки  дар натиҷа ду нафар кушта ва ду тани дигар захмӣ шуданд.

Манбаъҳо илова карданд, ки ҳадафи ин ҳамла кормандони Раёсати эҳё ва инкишофи деҳоти вилояти Майдон Вардак будаанд ва Риёз Аҳмад, сарпарасти раёсати мазкур низ маҷрӯҳ шудааст.

Аз сӯи дигар, соати 9:20 субҳи имрӯз дар натиҷаи таркиш дар автомашинаи “Land Cruiser” дар минтақаи микрорайони аввали ноҳияи шонздаҳум ду нафар маҷрӯҳ шуданд.

Ҳеҷ гурӯҳе, аз ҷумла “Толибон” (мамнуъ дар Тоҷикистон) масъулияти ин воқеаҳоро бар дӯш нагирифтааст.