Дар Душанбе даври шаҳрии Фестивали заргарии «Ҳунар омӯз …» ҷамъбаст гардид

Февраль 11, 2021 17:23

ДУШАНБЕ, 11.02.2021 /АМИТ «Ховар»/.  Имрӯз дар шаҳри Душанбе даври шаҳрии Фестивали заргарии «Ҳунар омӯз …» баргузор гардид, ки ҷойи аввалро ҶСК «Зари тоҷик», ҷойи дуввумро ҶСК «Карон гавҳар» ва ҷойи сеюм ҶДММ «Тоҷик кристалл» сазовор гардиданд.

Фестивали заргарӣ таҳти унвони «Ҳунар омӯз …» дар робита ба иҷрои Амри Президенти Ҷумҳурии Тоҷикистон аз 13 декабри соли 2018 бо ташаббуси мақомоти иҷроияи ҳокимияти давлатии шаҳри Душанбе баргузор гардид.

Даври шаҳрии Фестивали заргарии «Ҳунар омӯз …» бо рақобати солими довталабон аз чор ноҳияи пойтахт, ки ҳунармандони зиёдро фаро мегирифт, баргузор шуд.

Дар маросими ифтитоҳи фестивал муовини Раиси шаҳри Душанбе Дилшод Одиназода сухан гуфта, сипас ҳайати ҳакамон ва меҳмонон аз маҳсулоти пешниҳод намудаи ҳунармандони чор ноҳияи пойтахт дидан намуданд.

Зикр шуд, ки бо ташаббуси Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон баҳри рушди соҳаи сайёҳӣ, ҷалби бештари сайёҳон ба мамлакат ва муаррифии давлат дар арсаи ҷаҳон солҳои 2019-2021 Солҳои рушди деҳот, сайёҳӣ ва ҳунарҳои мардумӣ эълон карда шудаанд.

Ҳадафи баргузории Фестивали мазкурро масъулин дарёфти истеъдодҳои нав дар соҳаи заргарӣ ва ҷалби ҷавонон ба ин соҳа, инчунин рушди минбаъдаи малакаву маҳорати касбии мутахассисони соҳа, тақвият бахшидан ба касбияти баланди ҳунари заргарӣ, ҷалби бештари сайёҳони хориҷӣ ба кишвар ва тарғибу ташвиқи анъанаҳои арзишманди мероси пурғановати ниёгон ба муносибати сазовор пешвоз гирифтани ҷашни 30-солагии Истиқлоли давлатии Ҷумҳурии Тоҷикистон маънидод намуданд.

Ба гуфти заргарон, дар кори онҳо омехтаи нуқра бо мис беҳтар истифода мешавад.  Заргарон дар истеҳсоли маснуоти бадеӣ- зару зевар, асбобу ашёи рӯзгор, либосу аслиҳаи чангӣ аз фулузот: тилло, нуқра, мис, биринҷӣ, оҳан ва ғайра истифода менамоянд. Зимни омода намудани маснуот сангҳои гаронбаҳову рангаи лаъл, ёқут, фирӯза, зумуррад, лоҷувард, каҳрабо, булӯри кӯҳӣ, ҷамаст, яшм, ақиқ ва монанди инҳо ба кор мераванд. Аз маводи табиӣ устухони фил, садаф, марворид ва чандеи дигар истифода мешаванд.

Маснуоти сохтаи заргарон: ангуштарин, гӯшвор, зеби гардан, болои абрӯ (қоши тилло), каҷак, бозубанд, дастпона, ҳайкал ва амсоли инҳо аз ҷумлаи зеварҳои маъмулии занҳои тоҷик мебошанд.

Дар солҳои пеш заргарони Бухоро дар сохтани камарбандҳои васеи мардона, ки асосан бо фирӯзаву марворид хотамкорӣ мешуданд, шуҳрат ёфта буданд. Барои ангуштарин сохтан хӯлаи тиллоро ба қолибҳои тавонак, ба монанди кори рехтагарҳо гудохта мерехтанд. Сипас бо навъҳои сӯҳон онро соида, ҳамвор менамуданд ва ба он нигини сурх ё ягон санги гаронбаҳоро насб мекарданд.

Дар фарҷоми озмуни заргарӣ ғолибони фестивал бо мукофотҳои хотиравӣ ва диплому сипосномаҳои мақомоти иҷроияи ҳокимияти давлатии шаҳри Душанбе сарфароз гардонида шуданд.

Февраль 11, 2021 17:23

Хабарҳои дигари ин бахш

Дар шаҳраку маҳаллаҳои ноҳияҳои Душанбе озмунҳои «Беҳтарин ҳамсар» ва «Фарзанд – боғи падару модар» гузаронида шуданд
Дар асоси қарори Раиси шаҳри Душанбе дар пойтахт намоишгоҳи фурӯши либосҳои мактабӣ ва лавозимоти дарсӣ оғоз гардид
Доир ба муқовимат ба коррупсия чун кафили рушди соҳаи маориф конференсия баргузор гардид
Бахшида ба Рӯзи варзишгарони Тоҷикистон дар Душанбе Марафони велосипедронӣ баргузор мегардад
Дар шаҳри Душанбе 34-солагии Истиқлолияти давлатӣ ботантана ҷашн гирифта мешавад
Соли 2025 ба шаҳри Душанбе беш аз 450 ҳазор сайёҳ ворид гардид
Ба шаҳри Душанбе зиёда аз 11 ҳазор электромобил ворид карда шудааст
Соли 2025 дар шаҳри Душанбе 16 муассисаи таълимӣ ба истифода дода мешавад
НИШАСТИ МАТБУОТӢ. Дар ҳудуди шаҳри Душанбе сохтмони 7 эстакадаи нав оғоз меёбад
НИШАСТИ МАТБУОТӢ. Дар ноҳияи Сино сохтмон ва навсозии 279 иншоот ба нақша гирифта шудааст
НИШАСТИ МАТБУОТӢ. Корхонаҳои саноатии ноҳияи Фирдавсӣ ба маблағи зиёда аз 882 миллион сомонӣ маҳсулот истеҳсол намуданд
НИШАСТИ МАТБУОТӢ. Варзишгарони ноҳияи Исмоили Сомонии пойтахт дар мусобиқаҳо соҳиби 1620 медал шуданд