Дар Филармонияи давлатии Тоҷикистон бо донишҷӯёни Донишгоҳи миллии Тоҷикистон мулоқот доир гардид

Февраль 17, 2021 16:11

ДУШАНБЕ, 17.02.2021 /АМИТ/. Имрӯз мулоқоти роҳбарияти мақомоти иҷроияи ҳокимияти давлатии шаҳри Душанбе ва Раёсати Вазорати корҳои дохилӣ дар шаҳри Душанбе бо донишҷӯёни Донишгоҳи миллии Тоҷикистон баргузор гардид. Дар мулоқоти мазкур муовини Раиси шаҳри Душанбе Мавсума Муинӣ, сардори Раёсати Вазорати корҳои дохилии Ҷумҳурии Тоҷикистон,  генерал-лейтенанти милитсия Шариф Назарзода ва донишҷӯёну устодони Донишгоҳи миллии Тоҷикистон иштирок намуданд. 

Муовини Раиси шаҳри Душанбе Мавсума Муинӣ иброз намуд, ки ҳамасола аз ҷониби Роҳбари давлат ироа гардидани Паём ва муайян гардидани самтҳои сиёсати дохилӣ ва хориҷии мамлакат яке аз рукнҳои демократӣ, дунявӣ ва ҳуқуқбунёд будани Тоҷикистонро нишон медиҳад.

«Паёми Пешвои миллат дар ҳоле баён шуд, ки тамоми сохторҳои  давлативу ҷамъиятӣ ва мардуми сарбаланди тоҷик ба ҷашни бузурги 30-солагии Истиқлоли давлатии Ҷумҳурии Тоҷикистон ҳаматарафа омодагӣ мебинанд. Сарвари давлат дар ироаи Паём вобаста ба рушди иқтисодию иҷтимоии миллӣ сухан карда, барои беҳтар гардидани зиндагии мардум ба масъулин дастуру супоришҳои мушаххас доданд. Соли 2020 бинобар пандемияи COVID-19 барои тамоми мардуми сайёра, аз ҷумла тоҷикон соли вазнин буд. Барои пешгирӣ аз пайдоиш ва интиқоли ин бемории сироятӣ аз ҷониби Ҳукумати мамлакат тадбирҳои саривақтию зарурӣ андешида шуданд»,- гуфт Мавсума Муинӣ.

Ба зикри мавсуф, хушбахтона, аз охирҳои моҳи декабри соли 2020 то имрӯз дар мамлакат ягон ҳолати гирифторӣ ба бемории сироятии коронавирус ба қайд гирифта нашудаст.  Вале ин маънои онро надорад, ки мо беаҳамиятӣ зоҳир намуда, аз риояи қоидаҳои беҳдоштӣ даст  кашем. То он лаҳзае, ки дар Тоҷикистон реҷаи пӯшидани  ниқоб бардошта нашавад, мо бояд ин қоидаро риоя намуда, ба саломатии худу атрофиён беаҳамият набошем.

-Соли равон бахшида ба ҷашни 30-солагии Истиқлоли давлатии Ҷумҳурии Тоҷикистон дар мамлакат баргузории барномаҳои зиёди дохиливу байналмилалӣ дар назар дошта шудааст. Аз ин рӯ ҳар сокини мамлакат уҳдадор аст, ки барои  дар сатҳи зарурӣ баргузор шудани ин гуна чорабиниҳо саҳми арзанда гузорад ва обрӯю нуфузи Тоҷикистонро баланд бардорад,- иброз дошт М.Муинӣ.

Сардори Раёсати Вазорати корҳои дохилии Ҷумҳурии Тоҷикистон Шариф Назарзода иброз дошт, ки Раёсати Вазорати корҳоли дохилии Ҷумҳурии Тоҷикистон тасмим гиирифтааст дар доираи дастуру супоришҳои Пешвои миллат, Президенти мамлакат муҳтарам Эмомалӣ Раҳмон вохӯрии  аввалинро бо устодону донишҷӯёни Донишгоҳи миллии Тоҷикистон  баргузор намояд.

«Президенти Ҷумҳурии Тоҷикистон муҳтарам Эмомалӣ Раҳмон аз марҳилаҳои аввали соҳибистиқлолии мамлакат то ба имрӯз ба ҷавонон ва сиёсати давлатии ҷавонон таваҷҷуҳи хосса доранд. Сарвари давлат дар Паём ва суханрониҳояшон пайваста аз ин неруи созанда ва ояндасози кишвар сухан мекунанд. Аз ҷумла, 26 январи соли равон Роҳбари давлат  зимни ироаи Паёми хеш ба Маҷлиси Олии мамлакат таъкид намуданд, ки ҷавонони мо дар рушди тамоми соҳаҳои иқтисодиву иҷтимоии ҷумҳурӣ  саҳми арзишманд  гузошта, нақши онҳо аз иштирок  дар бунёди иншооти азими мамлакат то хизмати содиқона дар сафи Қувваҳои мусаллаҳ, суботу оромӣ, ҳифзи сарҳади давлатӣ  арзанда ва мояи ифтихори ҳар яки мо мебошад»,- гуфт Шариф Назарзода.

Февраль 17, 2021 16:11

Хабарҳои дигари ин бахш

Озмуни аксҳо таҳти унвони «Душанбе – шаҳри гулҳо ва зебоӣ» эълон гардид
То соли 2030 фаъолияти электросамокатҳо ва электроскутерҳо дар роҳҳои автомобилгарди Душанбе манъ мегардад
«KUDAK.TJ». Бо Қарори Раиси шаҳри Душанбе 20 муассисаи таҳсилоти томактабӣ ба ин барномаи иттилоотӣ пайваст гардид
Омодагӣ ба Форуми байналмилалии сармоягузории «Душанбе инвест-2025» баррасӣ шуд
Сокинону меҳмонони пойтахт тавассути хатсайри «City Tour» зебоиҳои Душанберо тамошо намуданд
Иҷлосияи сеюми Маҷлиси вакилони халқи шаҳри Душанбе, даъвати ҳафтум баргузор шуд
«САЙРИ ДУШАНБЕ». Ба муносибати Рӯзи ҷаҳонии сайёҳӣ дар пойтахт хатсайри ройгон ташкил карда мешавад
Имрӯз иҷлосияи сеюми Маҷлиси вакилони халқи шаҳри Душанбе, даъвати ҳафтум баргузор мегардад
Дар Душанбе Рӯзи забони давлатӣ дар сатҳи баланд таҷлил карда мешавад
DITE-2025: Душанбе ба маркази нави сайёҳии байналмилалӣ табдил меёбад
DITE-2025. Зиёда аз 10 ҳазору 500 нафар аз Намоишгоҳи байналмилалии сайёҳии Душанбе дидан намуданд
Масъалаи густариши ҳамкорӣ байни шаҳри Душанбе ва Ҷазираи Киш дар соҳаи сайёҳӣ баррасӣ шуд