ФУТБОЛ. Ба ҳайати асосӣ ва эҳтиётии «Хуҷанд» медалҳои нуқра супорида шуданд

ДУШАНБЕ, 11.02.2021 /АМИТ «Ховар»/. Дар маҷмааи меҳмонхонаи «Суғдиён»-и шаҳри Хуҷанд 10 феврал пас аз натиҷагирии мавсими гузашта маросими бо медалҳои нуқраи чемпионати Тоҷикистон ва чемпионати ҷавонони кишвар мукофотонидани дастаҳои асосӣ ва эҳтиётии дастаи футболи «Хуҷанд» баргузор шуд. Дар ин бора АМИТ «Ховар» бо истинод ба Федератсияи футболи Тоҷикистон хабар медиҳад.

Дар ин маросим раиси вилояти Суғд, раиси Федератсияи футболи Суғд, узви Кумитаи иҷроияи Федератсияи футболи Тоҷикистон Раҷаббой Аҳмадзода ва ноиби президенти ФФТ Алишер Урунов ширкат варзиданд.

Раиси вилояти Суғд Раҷаббой Аҳмадзода ба футболбозони Хуҷанд барои бозии шоистаашон дар мавсими гузашта изҳори сипос намуда, ба футболбозон тавсияҳои пурарзиш дод, ҳайати ҷавонони дастаро махсусан зикр карда, дар мавсими нав ба онҳо комёбиҳо таманно кард.

Ноиби президенти ФФТ Алишер Урунов зимни суханронӣ дар маросими супоридани мукофотҳо дар назди иштирокчиён ба раиси вилояти Суғд Раҷаббой Аҳмадзода барои дастгирии ҳамаҷонибаи даста изҳори миннатдорӣ кард. Ӯ футболбозон ва ҳайати мураббиёни дастаи «Хуҷанд»-ро барои ба даст овардани медалҳои нуқраи Лигаи олӣ ва мусобиқоти ҷавонон дар ҷамъбасти мавсими гузашта табрик гуфта, дар марҳилаи гурӯҳии Ҷоми AFC-2021 ба даста муваффақият орзу кард.

АКСИ ФФТ