Дар Маҷлиси намояндагон ҳамоиши идона ба муносибати Рӯзи Модар баргузор гардид

Март 5, 2021 15:08

ДУШАНБЕ, 05.03.2021 /АМИТ «Ховар»/. Имрӯз дар Маҷлиси намояндагони Маҷлиси Олии Ҷумҳурии Тоҷикистон ба муносибати таҷлили Рӯзи Модар  ҳамоиши идона баргузор гардид.

Тавре  котиби матбуоти Маҷлиси намояндагони Маҷлиси Олии Ҷумҳурии Тоҷикистон Муҳаммадато Султонов ба АМИТ «Ховар» хабар дод, Раиси Маҷлиси намояндагони Маҷлиси Олии Ҷумҳурии Тоҷикистон Маҳмадтоир Зокирзода иброз дошт, ки  «ин лаҳзаҳо, ки ҳамаи моро мақому манзалат, меҳру муҳаббат ва меҳрубониву самимияти модар гирди ҳам овардааст, ҳар яки шумо – вакилон-бонувони олиқадр ва тамоми модарону занони иззатмандеро, ки дар Маҷлиси намояндагон фаъолият менамоянд, ба ифтихори ҷашни фархундаи миллиамон – Рӯзи Модар  самимона табрик гуфта, бароятон тандурустиву хушбахтӣ, иқболи неку толеи баланд ва рӯзгори ободу осуда орзу менамоям».

Раиси Маҷлиси намояндагон ҳамчунин гуфт, ки то моҳи марти соли 2009 8 мартро дар Тоҷикистон ба унвони Рӯзи озодии занон ё Рӯзи байналмилалии занон таҷлил мекарданд.

Бо ибтикор ва пешниҳоди бевоситаи Асосгузори сулҳу ваҳдати миллӣ — Пешвои миллат, Президенти мамлакат муҳтарам Эмомалӣ Раҳмон  соли 2009 ба Қонуни Ҷумҳурии Тоҷикистон «Дар бораи рӯзҳои ид» тағйирот ворид карда шуд ва 8 март Рӯзи Модар унвон гирифта, ҳамасола дар саросари кишвар бо шукӯҳу шаҳомати хосса таҷлил мегардад.

Воқеан, зиндагӣ худ тӯли ҳазорсолаҳо нишон додааст, ки ҳеҷ гоҳ наметавонем муҳаббате беҳтар ва самимияте ҳақиқиву бештар аз модари худ дарёбем.

Аз ин лиҳоз, модар на танҳо азизтарин шахс барои ҳар фарзанд, балки гаронбаҳотарин сарвати ҳар халқу миллат мебошад.

Дар яке аз ривоятҳои куҳан омадааст, ки «атр аз гул, нӯш аз шаҳд, шодобӣ аз баҳор, меҳр аз офтоб ва зиндагӣ аз замин бардошта, ҳамаро бо якдигар омехта, зан офаридаанд, то зудбарорандаи ғамҳо ва афзояндаи шодиву нишоти мардум бошад».

Аз ин рӯ, зан – модар ба мисли баҳор пурнакҳату муаттар, сабзу хуррам ва шодобу шукуфо буда, бо оғози фасли баҳор ва арафаи соли нави аҷдодӣ, яъне омадани Рӯзи Модар ва ҷашни фархундаи Наврӯз дар кишвари зебову офтобии мо рамзи нек аст.

Маҳмадтоир Зокирзода ҳамчунин афзуд, ки Ҳукумати Ҷумҳурии Тоҷикистон бо ташаббуси бевоситаи Асосгузори сулҳу ваҳдати миллӣ — Пешвои миллат, Президенти мамлакат муҳтарам Эмомалӣ Раҳмон ҳанӯз аз нахустин рӯзҳои расидан ба Истиқлоли давлатӣ ба масъалаҳои марбут ба занон эътибори махсус дода, бо мақсади баланд бардоштани мақоми зан дар ҷомеа, ҳифзи ҳуқуқу озодиҳои онҳо кафолатҳои давлатии баробарҳуқуқии мардону занон ва вусъат додани имконоти иштироки фаъоли занҳоро дар тамоми бахшҳои ҳаёти сиёсию иҷтимоӣ ва иқтисодию фарҳангии кишвар тариқи ба тасвиб расонидани санадҳои меъёрии ҳуқуқии  алоҳида муқаррар намуд, ки нахустин ибтикорот дар миёни ҷумҳуриҳои тозаистиқлоли ҳудуди Иттиҳоди Давлатҳои Мустақил мебошад.

Дар натиҷаи таваҷҷуҳ ва дастгириҳои бевоситаю пайвастаи Пешвои муаззами миллат солҳои охир теъдоди занони мутахассису соҳибтаҷриба дар ҳама шохаҳои ҳокимияти давлатӣ – мақомоти олии қонунгузор, ҳокимияти иҷроия, судӣ ва дигар сохтору мақомоти давлативу ҷамъиятӣ ба таври назаррас афзоиш ёфт. Ва имрӯзҳо мо нақши барҷастаи онҳоро дар рушди соҳаҳои гуногуни ҳаёти ҷомеа, аз ҷумла қонунгузорӣ баръало мушоҳида мекунем.

Тавре аз суханрониҳои Пешвои муаззами миллат бармеояд, саҳми занон дар рушди соҳаҳои илму маориф ва тандурустии мамлакат торафт афзуда истодааст. Имрӯз дар соҳаи маорифи кишвар 73 фоиз ва тандурустиву ҳифзи иҷтимоии аҳолӣ қариб 68 фоизро занону бонувон ташкил медиҳанд.

Раиси Парлумони касбии мамлакат махсусан таъкид намуд, ки саҳми занон дар рушди соҳаҳои илму маориф ва тандурустии мамлакат торафт афзуда истодааст. Имрӯз дар соҳаи маорифи кишвар 73 фоиз ва тандурустиву ҳифзи иҷтимоии аҳолӣ қариб 68 фоизро занону бонувон ташкил медиҳанд.

Фаъолияти бонувон дар соҳаи кишоварзӣ ва рушди иқтисодиёти кишвар низ назаррас буда, ҳоло шумораи роҳбарони хоҷагиҳои деҳқонӣ аз ҳисоби занон ба 35 ҳазору 600 нафар ва занони соҳибкор ба 77 ҳазору 400 нафар расидааст.

Дар ин раванд Пешвои миллат зимни ироаи Паёми хеш 26 январи соли равон бо қаноатмандӣ зикр намуданд, ки Ҳукумати мамлакат ташаббусҳои занону бонувони кишварро минбаъд низ дастгирӣ карда, ба хотири ҷалби бештари онҳо ба вазифаҳои роҳбарикунанда тадбирҳои иловагӣ амалӣ мегардонад.

Ниҳоят, дар фарҷоми сухан таманно менамоям, ки Худо кунад дар оилаву ҷомеаи мо ба мисли Пешвои муаззами миллат муҳтарам Эмомалӣ Раҳмон – фарзандони поксиришту накукор, адолатпешаву ғамхор, ҳақталошу ташаббускор, далеру шуҷоъ ва ватандўсту ватанпарвар бештар тавлид ёбанд,-гуфт дар анҷоми баромадаш Раиси Маҷлиси намояндагони Маҷлиси Олии Ҷумҳурии Тоҷикистон Маҳмадтоир Зокирзода.

Бо ин ҳадаф дар назди Кумитаи кор бо занон ва оила вазифа гузошта шуд, ки лоиҳаи қарори Ҳукумати мамлакатро дар бораи «Стратегияи миллии фаъолгардонии нақши занон дар Ҷумҳурии Тоҷикистон барои солҳои 2021 – 2030» ва нақшаи амалисозии онро барои солҳои 2021 – 2025 таҳия ва пешниҳод намояд.

Март 5, 2021 15:08

Хабарҳои дигари ин бахш

Намояндаи Тоҷикистон дар кори иҷлосияи 148-уми Ассамблеяи парлумонии Иттиҳоди Давлатҳои Муттаҳид дар Женева иштирок намуд
Вакилони мардумӣ дар шаҳру ноҳияҳои Тоҷикистон бо намояндагони ҷомеа ва ходимони дин мулоқот намуданд
Тадбирҳои мубориза бо муҳоҷирати ғайриқонунӣ дар давлатҳои аъзои Созмони Аҳдномаи амнияти дастҷамъӣ пешниҳод гардиданд
Дар Душанбе вазъ ва дурнамои ҳамкории байнипарлумонии Тоҷикистон ва Гурҷистон баррасӣ шуд
Рустами Эмомалӣ ба Валентина Матвиенко ва Вячеслав Володин барқияи изҳори тасаллӣ ирсол намуданд
БАР ЗИДДИ ИФРОТГАРОИВУ ТЕРРОРИЗМ САРҶАМЪОНА МУБОРИЗА БАРЕМ. Андешаҳо дар ҳошияи мулоқоти Президенти Тоҷикистон бо намояндагони ҷомеа ва ходимони дин
Дар Маҷлиси намояндагони Маҷлиси Олии Ҷумҳурии Тоҷикистон созишномаҳо ба тасвиб расиданд
САРМОЯИ ИНСОНӢ. Рушд ва самаранокии истифодаи сармояи инсонӣ барои давлату Ҳукумат аҳамияти аввалиндараҷа дорад
Дар Маҷлиси намояндагони Маҷлиси Олии Ҷумҳурии Тоҷикистон Рӯзи Модар пуршукуҳ таҷлил гардид
НАҚШИ ЗАНОН ДАР ПАРЛУМОНИ ТОҶИКИСТОН. 8 зан аъзои Маҷлиси миллӣ ва 16 нафар вакили Маҷлиси намояндагон мебошанд
Дар Душанбе бахшида ба Соли маърифати ҳуқуқӣ ҳамоиш баргузор гардид
Имрӯз дар шаҳри Душанбе иҷлосияи ҳабдаҳуми Маҷлиси миллии Маҷлиси Олии Ҷумҳурии Тоҷикистон, даъвати шашум баргузор гардид