Дар Душанбе даври шаҳрии озмуни «Кадбонуи беҳтарин» ҷамъбаст гардид

ДУШАНБЕ, 03.04.2021 /АМИТ «Ховар»/. 2 апрел бо ташаббуси Мақомоти иҷроияи ҳокимияти давлатии шаҳри Душанбе дар Муассисаи давлатии «Боғи Ирам» даври шаҳрии озмуни «Кадбонуи беҳтарин» ҷамъбаст шуд. Дар он ҷойи аввалро Суман Сафаралиева аз ноҳияи Сино, ҷойи дуввумро Шабистон Гунгакова аз ноҳияи Фирдавсӣ ва ҷойи сеюмро Чаман Раҳимова аз ноҳияи Исмоили Сомонӣ ишғол намуда, бо диплом ва туҳфаҳои хотиравии Мақомоти иҷроияи ҳокимияти давлатии шаҳри Душанбе қадрдонӣ гардиданд. Дар ин бора аз Мақомоти иҷроияи ҳокимияти давлатии шаҳри Душанбе иттилоъ доданд.

Дар озмуни мазкур муовини Раиси шаҳри Душанбе Мавсума Муинӣ, муовини раиси Кумитаи кор бо занон ва оилаи назди Ҳукумати Ҷумҳурии Тоҷикистон Заррина Абдулмаинзода, сардори Раёсати кор бо занон ва оилаи Мақомоти иҷроияи ҳокимияти давлатии шаҳри Душанбе  Заррина Зуҳурова ва намояндагони чор ноҳияи шаҳри Душанбе  иштирок доштанд.

Дар даври шаҳрии Озмуни «Кадбонуи беҳтарин» ҳунару завқи кадбонуҳо, аз ҷумла, дар пухту пази якчанд навъ таомҳои миллӣ, ки аз ҷониби ҳунармандони чаҳор навоҳии пойтахт аз рӯйи номинаҳои ороиши дастархон, доштани малакаи истифода ва гузоштани зарф ва ашёи болои миз, омода ва пешниҳоди таомҳои субҳона, чоштгоҳ ва шом, пешниҳоди маълумот оид ба номҳои дурусти таомҳо, ғизонокӣ ва таркиби он дар лавҳаҳо, маҳорати омода намудани хӯрокҳои маҳаллӣ, миллӣ ва муосир, малакаи омода намудани намудҳои гуоногуни хамир барои пухтани нон ва дигар маҳсулоти нонӣ ба намоиш гузошта шуда, пешкаши ҳайати ҳакамон гардид.

Ҳадаф аз баргузории озмуни «Кадбонуи беҳтарин»- ин ҷалб намудани занону духтарони ҳунарманд, кадбонуҳои соҳибзавқ ба эҳё ва рушди анъанаҳои миллӣ, баланд бардоштани маърифати хонадорӣ, омода намудани духтарон ба ҳаёти мустақилона, парвариши эҳсоси худшиносӣ ва меҳанпарастӣ, эҳё ва ҳифзу нигоҳдошти беҳтарин суннатҳои миллии ниёгонамон дар самти омода намудани хӯрокҳои миллӣ, хӯришҳои болаззат, таомҳои маҳаллӣ, баланд бардоштани завқи кадбонугӣ ва ҳунари дастархонороӣ мебошад.

Озмуни «Кадбонуи беҳтарин» аз се давр иборат буда, даври аввали он дар ҷамоатҳои деҳот, шаҳрак, муассисаҳои таҳсилоти миёнаи умумӣ ва коллеҷу омӯзишгоҳҳои касбии шаҳру ноҳияҳои ҷумҳурӣ дар арафаҳои ҷашни Рӯзи Модар ва Наврӯзи байналмилалӣ баргузор гардид. Даври дуюми озмун дар марказҳои вилояти Хатлон, Суғд, ВМКБ ва шаҳри Душанбе доир карда шуд.

Ёдовар мешавем, ки озмуни мазкур бо ташаббуси Мақомоти иҷроияи ҳокимияти давлатии шаҳри Душанбе тибқи ҷадвали баргузории фестивал, намоиш, ид ва озмунҳои анъана ва ҳунарҳои мардумӣ дар Ҷумҳурии Тоҷикистон барои солҳои 2019-2021, ки аз ҷониби Президенти Ҷумҳурии Тоҷикистон тасдиқ гардидааст, ба роҳ монда шуд.

АКСҲО: Мақомоти иҷроияи ҳокимияти давлатии шаҳри Душанбе