Дар Душанбе таҳти унвони «Масъалаҳои мубрами таъмини амнияти иттилоотӣ » конференсияи ҷумҳуриявӣ доир гардид

Апрель 29, 2021 15:48

ДУШАНБЕ, 29.04.2021 /АМИТ  «Ховар»/. Дар шароити кунунии мураккаби ҷаҳонишавӣ таъмини амнияти иттилоотӣ яке аз масъалаҳои муҳим ба шумор меравад. Маҳз дар замони соҳибистиқлолии мамлакат бо ташаббуси Ҳукумати Ҷумҳурии Тоҷикистон заминаҳои меъёриву ҳуқуқӣ ва ташкили таъмини амнияти иттилоотӣ ташаккул ёфтааст. Инчунин гузариш ба гардиши электронии ҳуҷҷатҳою роҳандозии «ҳукумати электронӣ» ва қадамҳои нахустин ба сӯи иқтисоди рақамӣ аҳамияти амнияти иттилоотиро дар тамоми соҳаҳои хоҷагии халқ ҳамчун масъалаҳои мубрам арзёбӣ менамоянд. Дар ин бора имрӯз зимни Конференсияи ҷумҳуриявии илмию амалӣ дар мавзӯи «Масъалаҳои мубрами таъмини амнияти иттилоотӣ » ибрози назар карда шуд.

Конференсияи мазкур бо ташаббуси Саридораи ҳифзи сирри давлатии назди Ҳукумати Ҷумҳурии Тоҷикистон баргузор гардид.

Дар кори конференсия сардори Саридораи ҳифзи сирри давлатӣ Аҳтам Абдуллозода, намояндагони мақомоти давлатӣ ва ташкилот, инчунин дигар мутахассисони соҳа иштирок намуда, паҳлӯҳои гуногуни назариявӣ ва илмию амалии таъмини амнияти иттилоотиро дар замони муосир мавриди таҳлилу баррасӣ қарор доданд.

Аҳтам Абдуллозода иброз намуд, ки бо мақсади иҷрои банди 62 Нақшаи баргузории чорабиниҳои илмӣ ва илмию техникӣ дар ҷумҳурӣ барои соли 2021, ки бо қарори Ҳукумати Ҷумҳурии Тоҷикистон аз 27 марти соли равон тасдиқ шудааст, конференсия баргузор гардид.

Мавсуф зикр кард, ки дар заминаи барнома ва стратегияи қабулкардаи Ҷумҳурии Тоҷикистон дар самти роҳандозии «ҳукумати электронӣ» ва рақамикунонии иқтисодиёт Пешвои миллат муҳтарам Эмомалӣ Раҳмон зимни ироаи Паёми имсола ба Маҷлиси Олӣ дар мавриди таъсиси Агентии инноватсия ва технологияҳои рақамии назди Президенти Ҷумҳурии Тоҷикистон  зарурати такмили минбаъдаи заминаи меъёрии ҳуқуқӣ ва инфрасохтори амнияти иттилоотиро муҳим шумориданд.

Зикр гардид, ки дар соҳаи инноватсия ва технологияҳои рақамӣ омода намудани кадрҳои баландихтисос тавассути роҳандозии курсҳои такмили ихтисос ва таъсиси ихтисосҳои муносиб дар муассисаҳои таҳсилоти олии кишвар зарур аст.

«Имрӯз мо дар шароити зудтайғирёбандаи илму техника қарор дорем ва барои таъмини амнияти иттилоотӣ кадрҳое омода кардан зарур аст, ки бо амнияти иттилоотӣ кор баранд»,-афзуд Аҳтам Абдуллозода.

Ҳамзамон дар конференсия масъалаҳои ҳифзи техникии иттилоот, таносуби таҷрибаи миллӣ ва байналмилалии таъмини амнияти иттилоотӣ низ мавриди баррасии мутахассисон қарор гирифта, хулосаҳои илмиву амалӣ пешниҳод шуданд.

Дар хатми Конференсияи ҷумҳуриявии илмию амалӣ дар мавзӯи «Масъалаҳои мубрами таъмини амнияти иттилоотӣ» дар самтҳои асосии таъмини амнияти иттилоотӣ таклифу пешниҳодҳои мушаххас манзур гардиданд, ки минбаъд дар фаъолияти амалии мутахассисони соҳа қарор мегиранд.

София ШОИК,
АМИТ «Ховар»

 АКСҲО аз Саридораи ҳифзи сирри давлатии назди Ҳукумати ҶТ

Апрель 29, 2021 15:48

Хабарҳои дигари ин бахш

«ТОЗАГИИ СОҲИЛ». Аз атрофи Сирдарё 4,5 метри мураббаъ партов бароварда шуд
ОБУ ҲАВО: Имрӯз дар вилояти Хатлон ҳаво 33+38 дараҷа гарм мешавад
Раванди татбиқи лоиҳаи «Рушди устувор» дар меҳвари мулоқоти Баҳодур Шерализода ва Филипп Марсийон қарор гирифт
ОБУ ҲАВО: Имрӯз дар Тоҷикистон ҳавои бебориш дар назар аст
Дар Шаҳринав ярмарка-фурӯши маҳсулоти кишоварзӣ бо нархи нисбат ба бозор арзон баргузор шуд
ОБУ ҲАВО: Имрӯз дар Тоҷикистон ҳаво то 31+36 дараҷа гарм мешавад
Ба шарафи Рӯзи Ғалаба дар Хуҷанд Муҷассамаи хотираи қурбониёни Ҷанги дуюми ҷаҳон таҷдид мешавад
ОБУ ҲАВО: Имрӯз дар Тоҷикистон ҳаво камабр ва тағйирёбандаи бебориш мешавад
ОБУ ҲАВО: Имрӯз дар вилояти Хатлон ҳаво 30+35 дараҷа гарм мешавад
Дар Коллеҷи омори шаҳри Ваҳдат оид ба мушкилоти татбиқи технологияҳои иттилоотӣ машварати илмӣ доир шуд
Дар шоҳроҳи байналмилалии Душанбе-Ҳисор-Турсунзода аксияҳои «Тозагии роҳ» ва «Тозагии соҳил» гузаронида шуданд
ОБУ ҲАВО: Имрӯз дар шаҳри Душанбе ҳаво 24+26 дараҷа гарм мешавад

Маводҳои таҳлилӣ