Киштии зериобии Индонезия, ки шикаста се қисм шудааст, ёфт гардид. Ҳамаи 53 сарнишини он ба ҳалок расидаанд

ДУШАНБЕ, 26.04.2021  /АМИТ «Ховар»/. Неруҳои баҳрии Индонезия киштии зериобии гумшудаи KRI Nanggala-402-ро пайдо карданд ва ҳалокати ҳамаи 53 сарнишини он тасдиқ шуд, изҳор доштанд дирӯз мансабдорони низомии индонезӣ Хади Тяхджанто ва сардори ситоди ҚҲБ Юдо Маргоно, хабар медиҳад АМИТ «Ховар» бо истинод ба агентии «Синхуа».

Тибқи иттилои хабаргузорӣ, шикастапораҳои киштии зериобии гумшуда дар қаъри баҳр дар назди ҷазираи Бали воқеъ мебошанд.

Иртиботи киштии зериобӣ рӯзи чоршанбе пас аз машқ дар назди Бали бо флоти Индонезия қатъ гардид. Расонаҳои маҳаллӣ гузориш доданд, ки маллоҳони киштии зериобии гумшуда то рӯзи шанбе бо захираи оксиген таъмин буданд.

Рӯзи шанбе наҷотбахшон дар обҳои наздикии ҷазира шикастапораҳои киштии зериобиро пайдо карданд.

Як қатор кишварҳо, аз ҷумла Федератсияи Россия, Иёлоти Муттаҳидаи Амрико, Германия, Франсия, Ҳиндустон, Туркия ва Австралия ба Индонезия дар ҷустуҷӯи киштии зериобӣ кумак пешниҳод карда буданд.

                                                                       АКС: mirnov.net