БМТ ба ФБД барои анҷомдиҳии хизматрасонии махсус бо асъори хориҷӣ барои се сол иҷозатнома дод

ДУШАНБЕ,12.05.2021 /АМИТ «Ховар»/. Бо қарори Раёсати Бонки миллии Тоҷикистон ба Ҷамъияти саҳомии кушодаи «Фурудгоҳи байналмилалии Душанбе» оид ба анҷомдиҳии  хизматрасонии (фаъолияти) махсус бо асъори хориҷӣ ба муҳлати 3 сол иҷозатнома дода шуд. Дар ин бора ба АМИТ «Ховар» аз Бонки миллии Тоҷикистон иттилоъ доданд.

Қарори мазкур тибқи қонунҳои Ҷумҳурии Тоҷикистон «Дар бораи Бонки миллии Тоҷикистон», Қонуни Ҷумҳурии Тоҷикистон «Дар бораи танзими асъор ва назорати асъор» ва Дастурамал «Дар бораи тартиб ва қоидаҳои анҷом додани амалиёти асъорӣ — фурӯши мол, иҷрои кор ва хизматрасонӣ бо асъори хориҷӣ дар Ҷумҳурии Тоҷикистон» ба имзо расидааст.

Дар асоси он Департаменти идораи захираҳои байналмилалӣ ва сиёсати қурби асъор вазифадор карда шуд, ки дар Феҳристи дорандагони иҷозатнома барои анҷомдиҳии  хизматрасонии (фаъолияти) махсус бо асъори хориҷӣ сабти дахлдор ворид намояд.