Сарвазири Тоҷикистон Қоҳир Расулзода бо ҷараёни татбиқи лоиҳаи сохтмони роҳи мошингарди Душанбе-Бохтар ва фаъолияти хоҷагиҳои кишоварзӣ дар Хатлон шинос шуд

Май 21, 2021 21:43

ДУШАНБе, 21.05.2021. /АМИТ «Ховар»/. Имрӯз Сарвазири мамлакат Қоҳир Расулзода бо мақсади шиносоӣ бо ҷараёни татбиқи лоиҳаи сохтмон ва навсозии роҳи мошингарди Душанбе-Бохтар ва фаъолияти хоҷагиҳои кишоварзӣ ба вилояти Хатлон сафар кард.

Нахуст Сарвазири мамлакат Қоҳир Расулзода бо ҷараёни татбиқи лоиҳаи сохтмон ва навсозии роҳи мошингарди Душанбе-Бохтар шинос шуд.

Ҷалби мутахассисони варзидаи соҳавӣ, истифодаи техникаву механизми муосири роҳсозӣ ва фаъолияти шабонарўзии масъулони Маркази татбиқи лоиҳаҳои таҷдиди роҳҳои Вазорати нақлиёти Ҷумҳурии Тоҷикистон дар ҳамкорӣ бо шарикони рушд имкон фароҳам овард, ки то имрўз дар иншоот қисмати зиёди корҳои сохтмонӣ ба анҷом расонида шаванд.

Марҳилаи якуми роҳи мошингарди «Душанбе-Бохтар» 33,2 километр ва марҳилаи дуюм 39,6 километрро ташкил медиҳад.

Айни замон дар татбиқи лоиҳаи сохтмон ва навсозии роҳи мазкур мутахассисони дохиливу хориҷӣ бо истифода аз   техникаву механизми муосири роҳсозӣ ба таври густурда фаъолият доранд.
Мувофиқи нақшаи пешбинишуда, роҳи мошингарди «Душанбе-Бохтар» аз ду самти ҳаракат ба чор хатти ҳаракат расонида шуда, паҳноии роҳ аз 16 то 25 метрро ташкил менамояд ва пас аз татбиқи лоиҳа роҳ аз категорияи «III» ба категорияи «1-Б» гузаронида мешавад.

Ҳамчунин имрўзҳо чароғонкунӣ, сафолакпӯш намудан ва асфалтпӯшкунии нуқтаҳои боқимонда ҷараён дорад.

Масъулони Маркази татбиқи лоиҳаҳои таҷдиди роҳҳои Вазорати нақлиёти Ҷумҳурии Тоҷикистон ба сифати корҳо чун самти асосии талабот диққати хосса равона намуда, баъди анҷом ёфтани сохтмон дар ҳар қитъа сифати корро мутахассисони маҳаллию хориҷӣ бо истифода аз таҷҳизоти махсуси соҳавӣ  аз назар мегузаронанд.

Мавриди зикр аст, ки лоиҳаи сохтмон ва навсозии роҳи мошингарди «Душанбе-Бохтар» аз ҷумлаи иншооти бунёдшавандаест, ки бо саҳми Ҳукумати Ҷумҳурии Тоҷикистон дар якҷоягӣ бо шарикони рушд татбиқ карда мешавад.

Аснои шиносоӣ Сарвазири мамлакат масъулинро вазифадор намуд, ки  иншоотро дар муҳлати муайяншуда, бо сифати баланд ва ҷавобгӯ ба талабот ба истифода диҳанд.

Дар идома Сарвазири мамлакат бо фаъолияти  хоҷагиҳои кишоварзии ноҳияи Хуросон шинос шуд. Дар ноҳияи Хуросон заминҳои корам 11 ҳазору 384 гектарро ташкил медиҳанд, ки аз ин 7 ҳазору 147 гектараш заминҳои обӣ мебошанд.

Аҳли заҳмат дар баробари дигар маҳсулот дар 261 гектар картошка ва дар 260 гектар пиёз кишт кардаанд, ки аллакай мавсими ҷамъоварии ҳосил  оғоз гардидааст.

Истифодаи тухмиҳои хушсифат, риояи агротехникаи парвариш ва истифодаи тавсияи мутахассисиони соҳаи кишоварзӣ ба нашъунамои хуби зироат замина гузоштааст.

Натиҷа ҳамин аст, ки имрўзҳо ҳосили расида ҳавасмандии хоҷагидоронро бештар намудааст.

Бо мақсади гирифтани ду ва ё се ҳосил аз як қитъа аҳли заҳмат талош доранд, ки баъди ҷамъоварии ҳосил кишти дуюм гузаронанд.

Аснои мулоқот бо хоҷагидорон Сарвазири мамлакат таъкид дошт, ки дар заминаи таваҷҷуҳи роҳбарияти давлат ва Ҳукумати Ҷумҳурии Тоҷикистон барои кишоварзон имконияти мусоид фароҳам оварда шуда, пайваста дар ин самт имтиёзҳо татбиқ мегарданд.

Ҳамчунин дар ин рўз Сарвазири мамлакат аз мавзеъҳои аз офати табиӣ зарардидаи ноҳияҳои Вахш, Абдураҳмони Ҷомӣ ва Ёвони вилояти Хатлон боздид ба амал оварда, ҷаласаи сайёри Ситоди ҷумҳуриявӣ  доир намуд.

Май 21, 2021 21:43

Хабарҳои дигари ин бахш

Сарвазири мамлакат Қоҳир Расулзода дар ноҳияи Дӯстӣ бо рафти ҷамъоварии ҳосили пахта ва корҳои созандагӣ шинос гардид
Дар Душанбе таҳкими ҳамкорӣ вобаста ба конфронси СИТЕС баррасӣ шуд
Шуруъ аз 16 сентябр дар масири Сиан-Душанбе парвозҳои мустақими ҳавоӣ оғоз мегарданд
Тоҷикистон ва Иттиҳоди Аврупо ҳамкориро дар соҳаи энергетика ва захираҳои об тақвият медиҳанд
Сарвазири мамлакат Қоҳир Расулзода дар ноҳияи Кӯшониён бо ҷараёни корҳои созандагӣ ва хоҷагидорӣ шинос шуд
Сиёсати Тоҷикистон дар самти идоракунии ҳамгироёнаи захираҳои об дар Шветсия муаррифӣ карда шуд
Бонки аврупоии таҷдид ва рушд барои таҷдиди низоми нақлиёти шаҳри Душанбе маблағ ҷудо менамояд
Дар Минтақаи озоди иқтисодии «Данғара» татбиқи лоиҳаҳои муштарак бо сармоягузорони Чин баррасӣ карда шуд
Дар Неругоҳи барқи обии «Роғун» роботи махсуси кафшерӣ ба истифода дода шуд
Роҳҳои афзоиш додани ҳаҷми истеҳсол ва коркарди нахи пахта дар Тоҷикистон баррасӣ гардид
Дар Чин масъалаи вазъи заминҳои шӯр ва ишқордор баррасӣ шуд
Ангури хуштаъми Тоҷикистон дар бозорҳои шаҳри Самара ба фурӯш гузошта шудааст