Тоҷикистон ва Фонди Қатар оид ба рушд масъалаи густариши ҳамкориро баррасӣ карданд

ДУШАНБЕ, 08.11.2025 /АМИТ «Ховар»/.  Фонди Қатар оид ба рушд нақша дорад, ки дар оянда бо соҳаҳои афзалиятноки Тоҷикистон, аз ҷумла энергетика, маориф ва тандурустӣ ҳамкориро  густариш дода,  ҷиҳати рушди онҳо маблағгузориро бештар намояд. Дар ин хусус зимни вохӯрии Вазири молияи Ҷумҳурии Тоҷикистон  Файзиддин Қаҳҳорзода бо Директори генералии Хазинаи Қатар оид ба рушд Фаҳд Ҳамад Ал-Сулайтӣ, ки дар шаҳри Давҳа баргузор гардид, иттилоъ доданд.

Тавре аз Вазорати молияи Ҷумҳурии Тоҷикистон ба АМИТ «Ховар» хабар доданд,  дар вохӯрӣ ҷонибҳо аз сатҳи баланди ҳамкории дуҷониба изҳори қаноатмандӣ намуда, робитаҳои дӯстона ва шарикии созандаро омили муҳими густариши муносибатҳо дар соҳаҳои иқтисодию иҷтимоӣ арзёбӣ карданд.

Вазири молияи Ҷумҳурии Тоҷикистон доир ба раванди амалишавии лоиҳаҳои афзалиятноки миллӣ, бахусус дар бахши энергетика, маълумоти муфассал пешниҳод намуда, иброз намуд, ки Фонди Қатар оид ба рушд имкониятҳои маблағгузории худро барои пешбурди лоиҳаҳои калидии мамлакат васеъ намояд.

Тавре қаблан иттилоъ дода будем,  23 августи соли равон мулоқоти Президенти Ҷумҳурии Тоҷикистон муҳтарам Эмомалӣ Раҳмон бо Директори генералии Хазинаи Қатар оид ба рушд Фаҳд Ҳамад Ал-Сулайтӣ доир гардид.

Фаҳд Ҳамад Ал-Сулайтӣ иброз дошт, ки «кишвари мо ният дорад, ки ҳамкориро дар Осиёи Марказӣ, алалхусус бо Тоҷикистон вусъат диҳад. Дар самти ҷалби сармояи Қатар ба Тоҷикистон имконияти бузург мавҷуд аст».

Ёдовар мешавем, ки 28 августи соли 2025 Созишномаи молиявӣ ба маблағи 50 миллион доллари  Иёлоти Муттаҳидаи Амрико барои идомаи сохтмони Неругоҳи барқи обии «Роғун» байни Вазорати молияи Ҷумҳурии Тоҷикистон ва Фонди Қатар оид ба рушд ба имзо расида буд.

АКС: Вазорати молияи Ҷумҳурии Тоҷикистон