Пешвои миллат Эмомалӣ Раҳмон хатти оби нӯшокии деҳоти Боғпарвари ҷамоати Оқсуи ноҳияи Данғараро ба истифода доданд

Июнь 16, 2021 17:30

ДУШАНБЕ, 16.06.2021 /АМИТ «Ховар»/. 16 июн Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон марҳилаи аввали Лоиҳаи хатти оби нӯшокии деҳоти Боғпарвари ҷамоати Оқсуи ноҳияи Данғараро мавриди истифода қарор доданд.

Дар деҳоти Боғпарвар Пешвои муаззами миллат муҳтарам Эмомалӣ Раҳмон бо тоб додани ҷумак ба фаъолияти марҳилаи аввали ин шабакаи обрасонӣ оғоз бахшиданд.

Дар марҳилаи аввали иншоот, ки дар доираи татбиқи ҳадафҳои Даҳсолаи байналмилалии амал “Об барои рушди устувор, солҳои 2018 — 2028” бо дастуру ҳидояти бевоситаи Президенти кишвар муҳтарам Эмомалӣ Раҳмон аз ҷониби Корхонаи Воҳиди давлатии “Хоҷагии манзилию коммуналӣ” амалӣ шуд, 7 ҳазору 240 нафар аҳолии деҳаҳои Боғпарвар, Чаманистон ва Баҳори ноҳияи Данғара бо оби тозаи нӯшокӣ таъмин гардиданд.

Об аз канали калони дуюми Данғара тариқи насосҳои махсус аввал ба 2 ҳавзи ғунҷоишашон 250 метри мукааб ворид гардида, пас аз безараргардонӣ ба ҳавзи ғунҷоиши 500 метри мукааб интиқол ёфта, баъдан ба аҳолӣ тақсим мегардад.

Масофаи хатти оби нӯшокӣ 1 километру 400 метр буда, тариқи ду қубури обгузари қутрашон 160 миллиметр оварда шуд.

Дар марҳилаи аввал барои анҷоми корҳои сохтмонӣ, аз қабили бунёди чоҳҳои амудӣ, ҳавзҳои захираи об, васлу насби таҷҳизот ва қубурҳои қутрашон гуногун 3 миллиону 600 ҳазор сомонӣ харҷ шудааст.

Ҳамзамон барои фаъолияти муназзами ин шабакаи муосири обрасонӣ 1 адад трансформатори тавоноиаш 250 киловолт-ампер насб карда шуд.

Корҳои сохтмонии лоиҳаи мазкур моҳи феврали соли равон дар доираи эълон гардидани солҳои 2019 – 2021 ҳамчун “Солҳои рушди деҳот, сайёҳӣ ва ҳунарҳои мардумӣ” оғоз гардида, дар муҳлати муайяншуда бо сатҳу сифати баланд анҷом ёфт.

Президенти мамлакат муҳтарам Эмомалӣ Раҳмон аз сатҳу сифати корҳои анҷомёфта изҳори қаноатмандӣ намуда, ба масъулон ҷиҳати дар марҳилаи дуюм низ бо сифат анҷом додани корҳои сохтмонӣ ва кашидани хатти оби нушокӣ дастуру маслиҳатҳо доданд.

Аз руи маълумоти масъулини Корхонаи Воҳиди Давлатии “Хоҷагии манзилию коммуналӣ” дар марҳилаи дуюми лоиҳа тибқи дастуру супоришҳои Сарвари давлат бо насби 2 насоси обкаш зиёда аз 9 ҳазору 300 нафар сокинни деҳоти Оқсуи ноҳияи Данғара бо оби ошомидании бо сифат таъмин хоҳанд гашт.

Барои татбиқи лоиҳаи хатти оби нӯшокии деҳоти Боғпарвари ҷамоати Оқсуи ноҳияи Данғара, ки дар маҷмуъ 2 марҳиларо дар бар мегирад, зиёда аз 555 миллион сомонӣ сарф карда мешавад ва дар солҳои наздик мушкилоти норасоии оби нӯшокӣ дар ҷамоати мазкур бартараф мегардад.

Айни замон дар ноҳияи Данғара барои сол то сол беҳтару хубтар намудани таъминоти аҳолӣ бо оби нӯшокӣ дигар лоиҳаҳо низ мавриди татбиқ қарор доранд.

Бо татбиқи пурраи ин лоиҳа маҷмуан 2 ҳавзи калони захираи об ва дигар иншооти зарурӣ бунёд гардида, наздики 20 ҳазор сокинони маҳаллаҳои Оқсу бо оби тозаи нӯшокии аз лиҳози экологӣ тоза таъмин карда мешаванд.

Лозим ба таъкид аст, ки то инҷониб сокинони 3 деҳаи номбурда аз норасоии оби шомиданӣ танқисӣ мекашиданд ва акнун бо ташаббуси Сарвари давлат ин мушкилии онҳо роҳи ҳалли хешро пайдо намуд.

Ҳамзамон аз ҷониби Корхонаи Воҳиди Давлатии “Хоҷагии манзилию коммуналӣ” ба масофаи 1 километр роҳи деҳаи Боғпарвар мумфарш карда шуд.

Сокинони деҳоти Оқсуи ноҳияи Данғара иқдоми мазкурро тӯҳфаи арзишманди Президенти Ҷумҳурии Тоҷикистон муҳтарам Эмомалӣ Раҳмон дар арафаи таҷлили ҷашни Ваҳдати миллӣ маънидод карданд.

Ба истифода додани хатти оби нӯшокии деҳоти Боғпарвари ҷамоати Оқсуи ноҳияи Данғара 16.06.2021

Июнь 16, 2021 17:30

Хабарҳои дигари ин бахш

Намояндаи Тоҷикистон дар ҷаласаи Шурои директорони Шарикии глобалии соҳаи маориф дар шаҳри Занзибари Танзания иштирок намуд
Байни Тоҷикистон ва Чин долони нави ҳавоӣ ифтитоҳ гардид
Президенти Тоҷикистон: «Тоҷикон» ҳоло китоби рӯйимизии ҳар як фарди соҳибмаърифат ва бонангу номуси миллати тоҷик мебошад»
Тоҷикистон ва Чин тақвияти ҳамкории авиатсиониро баррасӣ намуданд
Тоҷикистон ва Бонки ҷаҳонӣ масъалаи тезонидани бунёди марказҳои агрологистикиро баррасӣ намуданд
ЧЕМПИОНАТИ ҶАҲОН ОИД БА БОКС. Варзишгари тоҷик Фариноз Абдуллоева барандаи медали нуқра гардид
Бо супориши Президенти Ҷумҳурии Тоҷикистон Ҷоизаи давлатии ба номи академик Бобоҷон Ғафуров таъсис дода мешавад
ИҚДОМИ НАКӮИ ПРЕЗИДЕНТИ ТОҶИКИСТОН. «Шоҳнома»-и Абулқосим Фирдавсӣ ба тамоми мардуми Тоҷикистон дастрас мегардад
НИГОҲДОРИИ РОҲҲО ДАР ЗИМИСТОН. Масъулини Вазорати нақлиёти Тоҷикистон дар ин масъала гузориш доданд
Академик Бобоҷон Ғафуров ҳамчун муҳаққиқи барҷаста ва ташаббускори илм дар рушди ховаршиносӣ саҳми бузург гузошт
Дар ташаккули шахсияти академик Бобоҷон Ғафуров модари ӯ -шоираи номдор Розияи Озод нақши ҳалкунанда бозид
Ҳилолбӣ Қурбонзода дар Конференсияи байналмилалӣ бахшида ба анҷоми раёсати Қазоқистон дар Муколамаи занони давлатҳои Осиёи Марказӣ иштирок намуд